祖兒未開封拒認剩女
樂壇天后容祖兒昨日舉行全新EP《空港》發布會，自爆經理人霍汶希為她的感情生活着急，但自信心十足的祖兒唔擔心變「剩女」，她謂：「剩即係用完用剩o架啦，我都未開封，大把市場呀！」
祖兒明日將推出全新EP《空港》，昨日舉行發布會兼主打歌《破相》MV首播會，MV中祖兒以紅髮淡妝造型示人，更有流淚、瞓地等鏡頭，她坦言特別喜歡是次的造型：「同平日化濃妝嘅我掉轉，今次冇乜顏色，係膽量嘅挑戰！」
學照顧自己
向來與經理人霍汶希（Mani）情如母女的祖兒，大爆對方即將到外地進修半年，她說：「忙完新碟宣傳後，我仲要畀心機照顧自己，因為Mani要去讀半年書，連我演唱會都睇唔到，要學習有嘢要自己直接跟同事講，唔可以再等Mani幫我出聲，每次開演唱會我都會同佢嗌交，呢個係習慣，不過今年都冇得嗌。（唔捨得Mani？）都有啲唔捨得o架！」
不強求緣分
問她Mani是否到外地秘密結婚？祖兒說：「唔知呀。（有同佢講感情問題？）佢好緊張我，間中都問我呢個得唔得，我次次都請佢食檸檬。（介紹富豪二代畀你識？）我都唔識，我唔喜歡刻意安排嘅緣分，緣分要嚟自然嚟o架啦！」祖兒直言不擔心做「剩女」，指「剩女」意指「用完用剩」，她得戚地說：「我都未開封，大把市場，終有日鐵柱都會磨成針！」
文：音樂組