大劉添慈姑椗 李嘉欣傳佗B贈興
劉鑾雄（大劉）再為人父，其女友呂麗君昨日為他誕下一子，湊巧昔日大劉的紅顏知己李嘉欣，昨又傳與夫婿許晉亨造人成功，已懷有三個月身孕，嘉欣有喜，給再做父親的大劉贈興。
曾經是大劉心目中的「the one」的李嘉欣，雖年屆40，但未曾放棄過做媽咪的心願，一直希望為許家傳宗接代的她，多次傳出有喜，惟每次均食詐胡，不過昨日大劉的女友呂麗君為他添男丁，嘉欣同日又突然傳出有喜，可見嘉欣與大劉關係果真欲斷難斷。
微博新相遮肚皮
有指嘉欣已成功造人三個月，老爺奶奶獲知消息後大為緊張，為免嘉欣受到騷擾，已即時安排新抱飛英國安胎，昨日黃昏時分，嘉欣在微博留言：「努力四小時的成果。」上載一張自己的新照片，相中的她穿上深色衣服，展示一張新畫作，其畫作又剛好遮了她半邊肚皮，令有喜之說更添疑幻疑真。嘉欣的經理人陳善之亦沒有否認她有喜，他說：「冇聽到嘉欣有喜，未能代表佢講嘢，到呢一分鐘冇收到通知佢要放長假期，嘉欣嘅工作仲係安排緊。」
呂母開心報喜訊
另方面，昨日呂麗君入住的養和醫院，有大批傳媒等候，呂母於下午六時左右到達醫院，一面高興的樣子，問到BB的情況，她說：「BB重8磅。（仔定女？）仔嚟嘅。（孖胎？）唔係。（似劉生定似呂麗君？）兩個都似。（改名未？）暫時未。」但沒有透露何時出世，又不斷向記者說多謝。不久有工作人員拿着兩BB品牌CHICCO的BB car sit和BB籃送上醫院。而呂母在醫院逗留個多小時，由兩名保鏢陪同下帶着呂麗君的大女劉秀盈離開。另外，大劉另一女友陳凱韻（甘比）則樂得逍遙，早前帶着女兒劉秀樺行中環shopping，試食朱古力，但齋食沒有買。
文：名人組