吳君如有B密冚：仲未得
曾公開揚言恨生B的吳君如，有傳經過一番努力，終於「得咗」﹗懷孕兩個月，但當事人君如卻以「仲未得﹗」回覆，不過，其老友任達華對喜訊十分雀躍，笑言若屬實要揀部靚相機送給君如！
吳君如○六年誕下女兒陳是知，至今已四年，君如一直都想再生，今年四月尾出席公開活動時，更開到口話恨生BB，仲話得到姑婆「賜予」生B古方，遂決定推掉兩部電影及暫停接戲三個月，估不到，四個月後，便有指君如「得咗」成功懷孕，預產期約明年四月！
生第一胎都唔認
記者就此事致電君如，她以短訊回覆：「仲未得！」雖然如此，但依君如做事方式，一向喜歡保留私隱，不愛公布懷孕喜訊，○五年君如懷第一胎時，便全程採取保密態度，就算○六年三月臨盆在即，腹大便便的她，仍腳踏三吋高踭鞋，出席公開活動，當時被問到預產期她還笑指自己：「我肥咗啫！哈哈哈！」
送連環快拍相機
跟君如十分老友的任達華，對於君如傳喜訊，則笑言：「太好喇！如果係真嘅話，會恭喜佢，好開心呀！」有指君如因為有了BB，所以推掉跟他合作的新片《熱愛島》，任達華則表示：「套戲係停咗，為咗呢件事（指君如有BB）冇所謂啦，好事嚟o架嘛，（會唔會送份禮物畀君如，賀一賀佢？）我會送部連環快拍相機畀佢，等佢可以一口氣影十幾張相，我都用緊嚟影個女，好好用。」
文：影視組