藝人一條心暫停活動悼亡魂

甘肅發生泥石流天災死傷無數，國家將今天定為全國哀悼日，娛樂圈亦一呼百應，各製作單位亦把今天所舉行的娛樂活動統統延期，即使吸引大批藝人參加的明星慈善賽車，原定於今日進行比賽，但昨日經大會緊急會議後，已鐵定把賽事延至明日（16日）舉行，一眾藝人如張智霖、郭富城、劉心悠、朱茵、葉璇、錢嘉樂、周麗淇、阮經天等，紛紛與經理人度期，看能否多留滬一天完成賽事，同時間大會亦研究會為災民舉辦籌款活動。

張智霖包尾都OK

正當藝人們忙於度期之際，錢嘉樂竟率先拍板答應留低，並搞笑謂：「我推咗幾部西片，應該冇問題，可以參加到，我本來仲有參加另外嘅賽事，比較專業啲，但架車壞咗囉！」而首次作賽的張智霖也跟嘉樂幽默一番：「我有個名號叫『未嘗一敗』，因為未參加過！我一向都係安全道路使用者，不過我諗到時包尾過終點都算OK。」張智霖原定明日跟名美術指導張叔平為新片《一代宗師》試造型，但最終亦決定為賽事留低。

同是首次參加賽事的劉心悠，表示明日應可以留低，她說：「以前玩過高卡車識自動波，棍波就唔識，所以心情好緊張。」朱茵對於賽事延期一天，坦言會向經理人爭取，預料留下機會大，她謂：「一場嚟到當然要支持，全國哀悼係應該，咁觀眾同藝人都要表示心意。」朱茵透露上次參加比賽時炒車，今次會多加注意安全，由於個子嬌小，故會於座位上加墊。

城城則謂：「我星期二有嘢做，本來星期一想返香港準備，依家都決定留低；其實我除咗參加慈善明星賽之外，我仲參加埋克里歐中國系列賽。」不過最後城城以第12名完成首輪賽事，比賽期間更與另一位車手發生碰撞，最後被迫退出第二輪賽事。

周麗淇全副武裝拍照留念。	阮經天已為賽事做好準備。	鄭伊健寄語各車手友誼第一，安全最重要。
城城將留低完成賽事才返港。	張家輝二話不說捐錢賑災。（資料圖片）

阿Sa鄭州商演改期

除了上海賽車外，英皇電影《綫人》演員張家輝、謝霆鋒、內地藝人苗圃等亦原定今日齊集北京舉行記招及首映，結果活動也要延期一天，發言人表示：「原定15日到北京舉行記招、首映，之後一日去上海，依家北京要延一日，諗緊會唔會將藝人分兩批，一批留北京，一批去上海宣傳。」張家輝昨接受電話訪問謂：「國家大事，全國哀悼，娛樂活動暫停一日自然可以理解，況且宣傳總有變通嘅方法，呢啲我一啲都唔擔心。（捐錢？）一年到晚都有做，呢次更加會。（照起程赴京？）係呀，影相訪問會照舊，只係唔會行紅地氈、唔會搞大型首映，呢樣我支持嘅。」

阿Sa蔡卓妍與鍾舒漫則原定今天出發鄭州商演，最後也要改期；內地藝人秦海璐於今天演出舞台劇《紅玫瑰與白玫瑰》，也基於全國哀悼日關係而取消，伊人更於微博上留言表示遺憾。