杜汶澤一杯奶茶救市
杜汶澤近年涉足幕後，任電影《前度》監製，推動拍戲進度，睇錢睇得很緊，希望電影有錢賺可繼續開戲；擔任《飛砂風中轉》編劇只收一杯凍奶茶當酬勞，為的是不想劇本在家漚臭，有戲開人人有工開，皆大歡喜！
杜汶澤（阿澤）入行十多年，近年除了做演員之外，還參與幕後工作，也許不少觀眾都知道他為電影《破事兒》、《前度》擔任監製，但卻沒有太多人知口碑相當好的《飛砂風中轉》是他編劇。
發揮同行互助
原來阿澤做編劇有一段古：「《風》片原本係我自己想拍，莊文強幫我寫劇本，後尾因為我拍嘅成本太貴，莊文強可以用平啲嘅價錢拍，我就叫佢拍啦，以前電影界競爭大，一年拍二百幾部，唔係你死就係我亡，好鍾意喺片場講是非，大數對手電影不是，但依家電影真係夕陽工業，舊年只得52部戲開，自己搞唔到就唔好放喺屋企度漚臭，依家證實莊文強有本事咪好囉！（演員係咪你嘅心水？）係呀，我之前都係諗住搵鄭伊健、陳小春去拍，佢哋嘅《古惑仔》系列深入民心，唔搵佢哋搵邊個。」
控制成本見效
首次做編劇，問阿澤酬勞如何？他表示：「莊文強有問過我個原創故事收幾多，我同佢講一杯凍奶茶，無所謂啦！」但阿澤擔任由鍾欣桐、陳偉霆及詩雅主演的《前度》監製十足十管家佬，成日叫導演麥曦茵慳啲使：「做人有時真係幾矛盾，我想做導演，監製成日叫我慳啲使，到我做咗監製，導演麥曦茵成日哀求我批多啲成本畀佢，我就死按住啲錢，事實證明我按得啱，套戲依家有錢賺，阿茵又可以再開戲，有錢營運等好多人都有工開。」
文：影視組