許志安生日愁住過 Sammi舞慶祝

昨日是安仔43歲生日，知己情人皆落空的安仔只好寄情工作，安仔與女助手於下午三時半步出家門，心情欠佳的他一身黑衣裝扮，聽到記者祝他生日快樂，他才臉露笑容，隨即跳上的士。

安仔乘的士直駛到排舞室，落車時對記者追問女友Michelle可有打電話給他？Sammi有冇SMS祝賀他？他頭耷耷一概不回應，當問到昨晚可有慶祝節目？他才說：「工作，我哋四個一齊排舞。」隨即登上樓上排舞室。另邊廂Sammi亦於下午三時左右到九龍城排舞，雖然Sammi對所有安仔生日的提問都封口不答，但見她心情大好，臉上流露笑容。

老友齊封口

孤家寡人的安仔雖沒有女友、Sammi相伴，幸還有三個好兄弟在側，安仔上排舞室後，梁漢文（Edmond）及張衞健（Dicky）緊隨先後出現，Edmond表示前晚已SMS祝賀安仔，他說：「安仔、Sammi、Michelle都係好朋友，作為朋友唔應該講太多，希望件事盡快過去，畀佢哋盡情投入工作，相信我朋友好專業。」手上攞着咖啡的Edmond，問他可會送禮物給安仔？他笑說：「齋啡，（飲你口水尾？）兄弟冇所謂。」Dicky落車後到快餐店先買奶茶，他抵死說：「唉，本來唔知佢生日，睇報紙知啦。」但他表示四人過往絕少互送禮物。約晚上八時半，眾人齊齊離開排舞室，安仔只表示好攰便由蘇永康接載返家。

文：音樂組　攝：追蹤組