溫碧霞一眼定緣領養孤雛
溫碧霞（Irene）婚後一直享受二人世界，到想要小孩時才發覺自己的身體健康應付不來，在機緣巧合下她在內地收養了一名孤兒來港，初次感受當媽媽的滋味，她說能夠與兒子遇上，是莫大的恩賜。
溫碧霞結婚十年仍沒有所出，直到兩年前在一位美國朋友介紹下，到了內地一間醫院看見一群被遺棄的小孩，她決定要收養，她說：「啲小朋友好得意，因為要美國公民至可以收養，我老公係美國公民所以就可以申請，我哋等咗兩年先收到囝囝嘅相片同資料，一睇到佢張相就決定要收養佢。」
上天恩賜
Irene的囝囝取名何國倫，是跟丈夫何祖光家族族譜改的，英文名Xavier。喜獲麟兒的Irene雀躍地說：「佢好乖，好有個性，係一個happy boy。佢今個月23日就一歲生日喇。我係喺上個月接佢返屋企，係我生日嘅月份，可以遇到佢係上天畀我一個好大嘅恩賜。」
問到為何不自己生小孩而選擇收養？Irene說：「結婚之後一直想過二人世界，因為好開心，冇諗過要生BB住，到真係想要小朋友時，就覺得可能自己健康應付唔嚟，之後見到內地嗰啲被遺棄嘅小朋友，好想幫佢哋，咁自己一向好鍾意小朋友，加上自己健康狀況唔適合生BB，我第一眼見到囝囝張相就已經好鍾意佢，好想接佢返屋企，我覺得好多嘢都係整定。」
心痛滋味
當Irene知道要迎接囝囝來港的個多月前已做足準備，買了大堆書本兼請教身邊朋友如何照顧BB。接囝囝回家那天更讓她深切體會到媽媽擔心兒子那種心痛的滋味，她說：「嗰日佢病緊，身上仲生咗啲紅色嘅粒粒，我即刻帶佢去睇醫生，嗰刻真係好心痛，我係第一次感受到呢種心痛嘅感覺，第一次感受到做媽媽嘅滋味，我知道嗰種愛係無分親生定收養，我都一樣係咁愛佢。佢依家已經成為我生命中好重要嘅人，我成日都會好掛住佢，佢帶畀我好多快樂。」
採訪：名人組
場地：荷花親子中心