陳淑芬同沈殿霞（肥姐）分屬好友，每年肥姐嘅生忌死忌，佢都好有心前往拜祭，早前佢就帶埋囝囝陳家豪去寶福山拜故友。陳太事事都親力親為，真係好有心，但家豪就似乎唔多慣，大汗疊細汗嘅佢一上到去就二話不說坐喺唯一嘅摺櫈上，享受大風扇，仲叫隨行服侍的菲傭喺個袋度攞咗條「冰硬」嘅毛巾出嚟抹面，認真識歎！直至佢知道好多記者影住佢，佢先起身幫阿媽手。陳太叫佢將啲生果放喺唔同嘅碟上，佢居然擺亂晒，結果要人幫佢執手尾。平時見家豪都喺鄭欣宜身邊照顧，更見過佢幫欣宜拎手袋，真係估唔到佢咁「少爺仔」喎！