趙世曾險遭綁架跳渠逃生

「富二代」近日屢成匪徒綁架目標，不過趙世曾女兒趙式芝表示不擔心成為受害人，平時去澳門亦不會單獨行街。趙式芝更大爆父親曾被綁架，她說：「爹哋大約喺九十年代尾曾被綁架，當時好興上深圳玩，老竇都鍾意去，有次被人綁架咗，好幾日唔見咗佢，仲以為佢去咗旅遊。事後佢亦冇同我哋講過，直至過咗好耐先向我朋友講番佢嗰次嘅經歷。」

驚嚇親家人唔敢講

趙式芝續說：「佢話畀人捉咗喺間屋度幾日，綁住手腳，期間佢留意啲匪徒動向，趁有一日得一個綁匪喺度，佢解咗自己手上嘅繩，撞向個匪徒，跟住逃離間屋不停跑，個匪徒一直追住，之後佢見到有個水池，即時潛入水池，等個匪徒遠離先上水，繼而再跑到有公安嘅地方，之後先安全。佢嗰時完全冇同我哋講，可能驚嚇親家人，唔敢講啦。」

記者致電趙世曾問他是否曾被綁架一事，他卻說出另一版本，但坦承指當年差點被綁，他憶述○一年險被綁架過程：「當年喺深圳餐廳食完飯出嚟，正想上的士時，被三個匪徒攔住，一個按住我個口，另一個揸住把刀對住我條腰，嗰時我都係博一博，仲後生夠氣夠力，即時推開佢哋不停走，一路走一路叫，佢哋都有追，我見到有個污濁坑渠水道，即時跳咗落去，之後都冇追嚟。」

趙式芝大爆父親趙世曾曾被綁架。 （資料圖片）

趙世曾有女友隋麗娜侍候，變得修心養性。

香港安全冇請保鏢

被問到是否有另一次綁架被困在屋中？趙世曾再次否認。記者追問事件後有否因擔心安危而請保鏢？他說：「初時都驚，有用自己公司嘅保安員，後來過咗一段時間都冇用。（有冇請保鏢保護子女？）香港都好安全，而且我又冇仇家，唔使請。」

採訪：名人組