港男裸嚟衰 衞道之士決賽踩場
無綫《香港先生選舉》昨日遭多個關注男士權益團體拉大隊，向廣播事務管理局及影視處投訴，斥節目賣弄男士身材、過於挑逗、意識不良、歧視男性，揚言廿一日決賽晚會拉隊踩場抗議。盛傳有份擔任港男司儀的周秀娜，亦以工作撞期為由推辭，令今屆港男雪上加霜。
無綫《2010香港先生選舉》舉行在即，昨日卻遭香港男士關注組、愛護家庭家長協會及平等公義協會投訴，指節目中男士泳裝近乎全裸、女評判可摸手摸腳、評判清一色為女性，有歧視男性之嫌。廣管局則表示自○七年起，已接獲相關投訴八十六宗，但投訴屬持牌機構製作方面的編輯自主，不屬條例規管範圍，已轉交無綫及適當的執法機構處理。
「唔好成日反乜反物」
熱爆書展和動漫節的周秀娜，本來獲邀擔任司儀，但她以工作撞期為由推辭，令港男「賣點」又少一個。雖然合作告吹，但她仍出言力撐無綫：「我好想做當晚司儀，但要拍戲，電影公司唔放期，惟有推咗，好可惜！但我會盡量度期做嘉賓，戴定con去瞄仔。（點睇有組織話踩場抗議？）香港愈來愈多顧問團，唔好成日反乜反物啦，呢個世界唔係仔瞄女，就係女瞄仔，個節目都係想效果好啫，演變到仔瞄仔，女瞄女，唔通就冇投訴咩！」
另外，周秀娜前晚應邀為夜店打碟，她自爆十八歲出席朋友生日派對時，被一名男士不停敬酒，最後要由朋友幫忙頂酒。
有份任港男司儀的呂慧儀則說：「清一色女評判唔算歧視！呢個係慣例，兩公婆去，個老婆一定唔會睇得放啦！」鄭裕玲則謂：「呢個係公司決策，我個人冇意見。」
無綫盡量聆聽意見
無綫外事部副總監曾醒明對於有團體抗議，他說：「節目係想帶出氣氛，無綫冇侮辱男性。今屆特設圓方戲院、奧海城直播，男女都可投票參與，平衡番各界聲音。若有團體抗議，無綫會盡量聆聽意見。無綫有指引畀女嘉賓，盡量唔好有身體接觸，說話唔好太挑逗性，但女嘉賓好多都係演員身份，表現投入，係會激咗啲。」港男監製衛世輝亦表示不擔心抗議人士踩場，揚言對無綫保安有信心。
文：影視組