軒仔重新唱作玩真人騷
張敬軒（軒仔）明年踏入3字頭，一切重新出發，他自爆因為跟唱片公司鬥氣，過去四年都是hea住度過，但任性的日子已過去，今日的軒仔，誓要做回自己。
軒仔將於10月推出新碟《Why Not》，乃過去四年以來首張全唱作大碟，今次軒仔一腳踢包辦作曲、監製、編曲和混音，他說：「做完音樂劇之後，熱誠返晒嚟，其實我一直好想出唱作碟角逐唱作人獎項，做番老本行。」
30歲禮物
大碟叫《Why Not》，主題講積極，軒仔說：「現實社會好hea、冇追求，但其實要搵理想。（講自身經歷？）有，過去幾年做live show試過唔記得歌詞、甩嘴，狀態唔好令工作態度唔好，其實《笑忘書》之後冇寫過歌，唔多唔少同唱片公司鬥氣，因為寫歌要等，但公司唔等，《酷愛》嘅成功，啲人覺得張敬軒唔一定要唱自己歌，自己咪算囉，過去四年做嘢hea hea哋，明年踏入「3」字頭，今年開始唔可以咁，雖然後生時可以任性，但要吸取教訓。」
軒仔三十而立，新碟將以DVD真人騷記錄唱作過程，包括屋企起居飲食同錄音室花絮，父母、好朋友都會入鏡，他說：「自己一直有心願好想用video做紀錄，算係送畀自己30歲嘅生日禮物。」
宣傳有計
由於唱片公司和無綫的版稅問題依然未解決，軒仔惟有諗計自求多福：「今次新碟宣傳用全新方法，集中網絡多啲，呢一年自己開咗微博，又有blog，雖然少咗TVB，但宣傳費反而多咗，以前book車都幾千蚊，今次自己搞可以拉低成本，自己又收平咗，慳番20%、30%。」為了配合新碟宣傳，軒仔將於9月舉行音樂會，演繹多首新歌。
採訪：音樂組
服裝：Energie
化妝：Hetty Kwong
髮型：Aaron Kwok by Hip Hair Culture
場地：Crowne Plaza Hong Kong