君如咀周慧敏奉旨脷疊脷

兩位一代美女君如和周慧敏，為了許鞍華執導新片《得閒炒飯》中飾演一對同性情侶，當中不乏接吻戲和床上戲鏡頭。周慧敏表示為了導演和君如才「重出江湖」，她說：「我好鍾意個劇本，一知道君如動筆簽咗落實會拍，我一口應承，真係好期待同佢拍接吻戲。」

激到甩色

對於戲中接吻鏡頭，君如大讚周慧敏：「佢咁多年都咁正，佢着住套豹紋吊帶睡內衣我見到都噴血。同佢錫都好激o架，錫到唇膏甩晒好似貴利收數（脷疊脷）。我自從生咗小朋友後，已經着唔落吊帶衫，依家變晒卡通睡衣。」周慧敏立即大讚君如身材相當正：「一場浴缸戲佢零點九九秒浸落水，我都睇到佢Body Shape，好正！」

君如有場浴缸戲要騷身材，周慧敏即時瞄實。

君如和周慧敏一向老友鬼鬼。

送小禮物

問到二人合作時相當投入，有否一刻真的會掛念對方，君如直說：「如果我鍾意女人，我會掛住周慧敏囉。」而周慧敏表示君如對她很好，會不時送上小禮物給她，令她感受到大家互愛氣氛來讓她投入角色。問到會否因此片榮登女同志偶像，君如說：「我唔使拍呢啲片先會。（有女仔追過？）以前讀女校，開始識戀愛都唔識射去邊，會同啲同學好傾啲啫。不過有啲人唔理你點諗都照追。」而周慧敏表示當年出道搞歌迷會，全場得兩男歌迷，她說：「試過拍MV個男主角同我講，佢女朋友知道係周慧敏先畀佢拍，個女仔好信得過我。」

文：影視組

髮型：Vic Kwan @ Hair Culture

化妝：Arris Law @ Atelie d' AR

髮型：Ason Wong @ Festival Walk Hair

場地：JIA Boutique Hotel