祖兒擘口冇feel阿Sa讚No.1

林峯、祖兒、阿Sa及王祖藍於英皇及邵氏合作的新片《翡翠明珠》中大玩四角戀，當中祖兒和阿Sa更與林峯有親吻戲份，擁有豐富咀戲經驗的阿Sa，被問到林峯是否很好咀？她一臉享受謂：「好到極，真係No.1，從未試過咁好添！」相反祖兒只換來一招蜻蜓點水式，難怪祖兒扁嘴謂：「都feel唔到好唔好咀，因為feel到嘅位實在太少，最搞笑係要定格，唔可以合埋個嘴，幾驚我啲口水漏咗落佢度，下次都係搵祖藍咀。（高度唔啱！）咁我抱住佢啦！哈哈！」

獲封影壇長青樹

對於公司高層吳雨揚言《翡》片有機會提名明年電影頒獎禮，問到三人可有信心？沒料到九年前曾主演電影《別戀》的林峯，竟然玩失憶自言是影壇新丁，阿Sa與祖兒亦由最初奸笑到哈哈大笑，祖兒更抵死謂：「點呀，影壇長青樹！」阿Sa則搖頭笑說：「真係幫你唔到。」自知講錯說話的林峯惟有以笑遮醜，惹笑非常。

祖兒繼六年前的《神經俠侶》後再戰影壇，表示望藉今次機會讓大家重新認識電影內的她：「咁耐冇拍戲，所以拍嗰時好緊張同驚，驚連累到劇組同演員，好在拍完睇番效果都幾好，咁又有影后阿Sa教路呢！」

阿Sa對祖兒與林峯的咀嘴圖片似乎十分欣賞。

祖兒「息影」六年「復出」，對劇本要求甚高。

廣州宣傳亞運會

阿Sa則表示與祖兒相識多年，今次才有機會於電影合作，再加上與林峯及祖藍，幾位年輕人於片場玩得不亦樂乎，故拍攝過程相當愉快。眾人被問到對票房可有壓力？祖兒竟說笑謂：「我擔心好唔過《反斗奇兵3》囉！ 我set個預期好高o架，不過套戲內地都會上，所以都有信心。」

此外，獲第十六屆亞運組委會委任為唯一一位「亞運歌曲推廣大使」的祖兒，昨日與古巨基和阿Sa以「亞運歌手」身份，出席在廣州舉行的「2010年廣州亞運會倒計時100天慶典晚會」，他們席上合唱亞運歌曲《Every One》，將慶典推至高潮。

文：影視組

攝：吳文聰