薛家燕賤價售縮水舖蝕80萬
九二年底位於佐敦道的佐敦廣場落成，當年在藝人麥翠嫻與其老公龔汝華大力推薦下，薛家燕以一百一十萬買了兩個舖位，怎料卻發生了縮水舖事件，經過了將近十八年的周旋，薛家燕日前以每個十三萬八千元價錢售出，帳面蝕了八十多萬。
對此，薛家燕表示：「雖然蝕好多，但我唔想糾纏落去，當年係用《真情》成年嘅收入買咗呢兩個舖，但纏擾咗差唔多廿年，加上個舖頭荒廢咗咁耐，日久失修可能要再揼錢落去維修，而我哋成班苦主有一個苦主聯盟，但同我哋打官司嘅公司都清咗盤，有啲業主聯絡唔到，我都惟有放棄，決定以賤價將兩個舖賣咗出去，有啲業主都好似我咁，依家都算係放下心頭大石，因為呢件事我同其他業主都成為咗好朋友，攞到錢之後，會食餐飯慶祝！」