陳庭欣認似余慕蓮太子爺唔敢埋身
港姐冠軍陳庭欣曾與旅行社太子爺黃進達（Jason）鬧緋聞，雖然她已否認並向男友派定心丸，但昨日活動影大合照時Jason都刻意避忌。對於被網友指似余慕蓮及形容為「香港豬扒」，陳庭欣笑言：「似佢冇問題，啲形容詞幾得意。」
今屆港姐冠、亞、季軍陳庭欣、張秀文及莊思明及最上鏡小姐李雪瑩昨日到大會指定旅行社接受獎項頒發，與陳庭欣傳緋聞的太子爺Jason到場後都有與她拍攝短片，對於賽果有「造馬」嫌疑，陳庭欣謂：「Jason並唔係我緋聞男友，亦相信評判公正，（佢對你特別好？）唔覺，（見面會否尷尬？）唔會，都唔係，唔需要避忌。」她坦言身在外地的男友被友人質問，她說：「佢話都幾好笑，但大家100％支持，我哋知大家諗乜，（他會否以你為傲？）佢當然開心，佢屋企人仲開心過佢。」
返港後冇再聯絡
在影大合照時，見Jason都刻意避免跟陳庭欣站在一起，事後問他會否因緋聞而介意，他說：「唔介意，都係流言，佢攞冠軍係實至名歸，（好欣賞佢？）咁多位都欣賞，拍完外景大家冇聯絡。（佢有男友會否感失望？）好多男仔都失望，但我唔會。」此外，陳庭欣遭網友指似余慕蓮及香港豬扒，對此她阿Q精神的謂：「我都有留意，網上啲批評有好有壞，不過唔會因此唔開心，會正面改善，可能某啲角度、個嘴似佢，似佢冇問題，唔係好負面，啲形容詞好得意，家人都覺得好好笑。」
莊思明咀女正常
昨日回復正常髮型的莊思明則笑言：「花師奶我自己改嘅，幾得意，我唔介意，一出嚟啲人就記得係邊個。」被指似周啟邦兒子周國豐的她，與對方本身認識，坦言把他拖埋落水感到不好意思，她又坦言孖生姊妹Mona比較嬲怒，她說：「Mona好嬲，發晒脾氣，我叫佢冷靜啲，（拉埋佢落水嘛！）其實我哋唔似，佢個樣Cute啲。」對於她在網上有不少與同性的咀嘴相，她坦言：「向來性格係咁，男女朋友都係，一熟落就會比較Close，冇刻意去刪除Facebook啲相。」
文：影視組