莊思明髮火燒相洩憤
新一屆香港小姐前晚順利誕生，但賽後話題並沒有落在冠軍陳庭欣身上，觀眾反而最有興趣談論前晚比賽末段，莊思明的嚇人蓬鬆髮型。網友「惡搞」她，嘲諷似足卡通人物「花師奶」，連校長譚詠麟也取笑髮型像「鳥巢」。莊思明接受訪問時也自覺似「花師奶」，更希望能一把火將相片燒掉，她說：「我都接受唔到！」
《2010香港小姐競選》前晚曲終人散，昨日得獎佳麗下午先與傳媒見面及後再到珠寶贊助商六福出席領獎活動。奪得季軍的莊思明反而成為賽後焦點，前晚在比賽尾段以低胸旗袍示人，波濤「胸」湧，睇頭十足，但也不及她嚇人的蓬鬆髮型吸引，出街後隨即引起網友熱烈討論，有網友更嘲諷莊思明的髮型十足十卡通人物「花師奶」，亦有指她的樣貌極似周啟邦的兒子周國豐，莊思明接受訪問時自嘲說：「我自己都覺得似花師奶，問髮型師有冇問題，佢話冇問題，攞獎後仲打電話嚟讚個髮型好靚。不過自己卻為似花師奶而耿耿於懷。」
家姐有power攞冠軍啦
對於譚詠麟也加入戰團取笑莊思明髮型似「鳥巢」，她笑說：「咁個頭係出咗事嘛，算啦，好介意，但係都冇得介意啦，當時趕住上台都冇時間轉髮型啦，我呢個look相信會流傳落去，我想燒晒啲相。」可擔心外間的攻擊陸續有來？莊思明說：「由第一日參選已經有心理準備，自己都接受唔到（指花師奶髮型），又叫人點接受呢，希望大家見到我真人之後對我改觀啦，大家忘記佢啦。」
獎項雖然已經塵埃落定，但一如以往，外間對賽果也質疑有「造馬」之嫌，莊思明回應被指靠名模家姐莊思敏才奪得季軍，她說：「我家姐只係model啫，邊有咁大power呀，如果有咁大power，我就攞咗冠軍啦。」無綫及廣管局接獲九宗投訴斥莊思明奪獎是「造馬」，她說：「我都預咗有投訴，比預期中少，年年都有人畀人話造馬，今年就輪到我。」
全家祝捷思敏撐妹
而昨日凌晨莊思明出席慶功活動後即由大會七人車送返貝沙灣豪宅，莊思明昨透露返家與兩位姐姐拍照，兩位家姐更拿了她的后冠試戴，她指爸爸更計劃游說孖生家姐莊思華明年參加港姐選美。
另外，昨晚莊思敏與家人在中環為妹妹慶祝，對於妹妹被指造馬？莊思敏則說：「如果係造點解唔做冠軍呀？咁講對我妹妹、評判及台前幕後都唔公平，我都喺現場睇，佢係實至名歸，問答環節更出乎意料之外答得好。」問莊思敏覺得妹妹差甚麼未能奪冠？她說：「佢啱啱讀完書，係細路女，我都貼陳庭欣係冠軍。」對於妹妹的「出事」髮型，莊思敏則說：「睇到都嚇親，但髮型師好鍾意呢個髮型，好彩臨尾先出現。」
採訪：影視組 攝影：攝影組