Stephy試戲蝕底森美讚索
鄧麗欣（Stephy）為幫好友森美、小儀的歌劇造勢，昨日身穿izzue黑色露腰連身裙出席謝票會。自知裙短易走光的她，坐下和森美、小儀交流演戲心得時小心翼翼，又蹺腳又揞裙頭。可是到試戲環節，全情投入的她跪地時，竟懶理台下傳媒，突然「豪情擘髀」，裙底內的黑絲襪透出「白底」，令人遐想度比其曲線纖腰高出百倍。
同台的森美不時大讚Stephy腰靚，但對好拍檔小儀就相當粗暴，除四度用腳掃跌小儀外，又抱起她狂fing，連小儀都忍不住大鬧森美「黐線」，更笑言有衝動閹了森美。
為工作捨餅會
Stephy自爆要返大陸和緋聞男友方力申拍劇，故未能出席Cookies餅碎成員舉行的演唱會，問她是否避見人？Stephy否認：「冇咁諗，為工作都冇法，我都好失望，好唔開心。惟有私下約大家食飯，（會唔會叫埋傳不和嘅傅穎？）大家全部一齊，或者再等Serena（Cookies成員）結婚時再齊人見面。」有謂Stephy顧住陪小方而忽略舊友，她反駁：「都係為工作啫。（同小方對足三個月會唔會搞出人命？）會架，會搞到生病。」因不食辣，她打算自備爐具開工，問是否煮給小方食？Stephy口快快說：「食自己。」
文：音樂組