安仔回復單身避談翻撻
許志安在「翻撻」舊愛傳聞鬧得熱烘烘之際，突然自爆與圈外女友余德琳（Michelle）分手，但就迴避是否舊情復熾，據知Michelle對安仔隱瞞與舊愛在台灣入住同一間酒店而吵大鑊，最終提出分手決定。
最近盛傳安仔與女友Michelle鬧分手，更與舊愛有「翻撻」迹象。前晚安仔夥拍樂隊RubberBand舉行最後一場「拉闊音樂擂台」，會上安仔翻唱鍾舒漫的《給自己的信》，其舊愛早前也在演唱會中選唱這歌，兩人連揀歌「taste」都一樣。舊愛則透過經理人對安仔與女友分手不作回應。
據知Michelle早就向大會攞飛捧男友場，不過最終未有露面。
聞女友色變
音樂會後安仔分享演出感受，情緒極之高漲，興致勃勃。但一問及早向大會攞飛捧男友場的Michelle沒有露面時即突然臉色一沉：「你問咩？」隨即嚴肅自爆與女友已分手，他一臉苦瓜乾說：「我依家一個人，係單身，（幾時分？）上個月嘅事，（點解分？）同你哋一樣我都係人，佢係好好女仔，唔知點講，（邊個主動提出？）唔需要講，（之前傳分手點解唔答？唔識答？）係呀，真係唔知點答。」
與前度無關
當問到分手是否與舊愛翻撻有關，安仔說：「唔關事，總之我哋一句講晒，我哋只係唔夾。」據聞Michelle因安仔不肯公開兩人關係，已大感不是味兒，兩人經常為此而嘈交，而分手導火線是六月安仔與舊愛分別到台灣工作，安仔聲稱兩人入住不同酒店，怎料有雜誌影得安仔與舊愛在同一酒店前後腳出入，懷疑男友與舊愛「撻着」愛火重燃，結果兩人大吵一鑊，Michelle終提出分手。
RubberBand不知安仔與女友分手消息，大讚安仔是專業藝人：「綵排時唔覺佢唔開心，都係頭先聽佢訪問先知佢分手，（隱藏得好！），工作時表現出專業態度，我哋都要向佢呢方面學習。」
文：音樂組