娜姐女王出巡粉絲開火

周秀娜昨日無視動漫節主辦單位的「禁足令」，以「龍Online」代言人身份硬闖攤位舞台，吸引逾三百宅男及市民圍觀。娜姐以性感女媧造型現身，主辦單位派出十名保安及六名工作人員築成人鏈，護送她由職員通道進場，儼如「女王出巡」，場面架勢，而「娜迷」擸齊攝影架生，瞄準偶像「開火」。

問娜姐入場時有否遭到阻撓？她風騷說：「冇人阻，好順利，係件衫個花太誇張，開門時開得一邊，搞到我要打橫入嚟。（犯規犯得開心？）冇話犯唔犯規，我係做番代言人要做嘅嘢，（以咩身份嚟？）我有買嘢，係以顧客同代言人兩個身份嚟。」

娜姐被三百宅男及市民包圍，場面墟冚。

離開時娜姐要披上黑巾護胸，被不少宅男追住她喪影，情況混亂。

拍賣服裝

娜姐自言不擔心大會將她列入黑名單：「唔驚，根本冇話唔畀邊個入，只係大會驚多人混亂，相信參展商有通知大會。（會唔會罰款？）我樂意畀，希望啲錢可以做番今（昨）日嘅善事。」問到有否覺得較以顧客身份入場的楊梓瑤（Carol）幸運？她說：「冇去諗其他人。（怕唔怕被Carol同陳靜抽水？）大家都係以和為貴，我不嬲唔鍾意去抽人啲咩，抽我脂都唔好。」此外，原定安排現場拍賣娜姐身上的女媧服，但擔心惹起混亂，故臨時取消，並改為在網上拍賣，而善款則捐往「兒童危重病基金」。

串錯英文

其實昨午娜姐已做足準備工夫整裝待發踩場！期間到代言攤位買光碟時，更寫上支持語句，惟她將Server錯串成「sever」，要問旁人正確串法，十分搞笑！

娜姐經理人Roy被問到有否違規？他說：「又唔係第一日做動漫節，如果唔想畀人入，不如Cut晒所有嘢。」問到事前有否通知大會？Roy說：「主辦單位有Check過警方方面，警方根本冇List任何名，大會亦冇硬性規定唔畀。」

女媧傳說

在中國神話中，女媧是擁有人頭蛇身的女神。相傳女媧煉石補蒼天，更創造世間萬物，於首六天創造了雞、狗、豬、羊、牛和馬六種動物，在第七天以手搓泥創造了不同性格和樣貌的人類，乃人類的始祖。

文：專案組