超雲甩拖認與男友唔夾

林峯一連四場紅館演唱昨晚舉行尾場，本報前日獨家報道超雲與相戀不到半年的皮草太子爺王大業（Andy）分手，昨晚她身穿吊帶性感服飾風騷現身大晒事業線，並大方談及甩拖心情：「幾好呀，都嚟睇騷咯。（甩拖？）唔想講呢方面嘅嘢。（你嘅感情狀況？）唔係已婚。（單身？）唔可以講單唔單身，係冷靜期。（男友有公子病？）我唔知，你問番佢。（點解要冷靜？）兩個人相處耐咗，認識多咗，有少少唔夾好正常！」

降呢為朋友關係

是否爸爸何鴻燊拆散鴛鴦？以及與Andy現時是何關係？超雲說：「朋友關係，有聯絡。（會復合？）唔知。（等佢改善咗先？）唔關呢啲事，係雙方面。」其他捧場的嘉賓，包括無綫高層樂易玲、梁家樹、陳法拉及男友薛世恒、歐陽震華夫婦等。

王大業	陳法拉與薛世恒孖住睇騷。

林峯瞓身壓子珊

林峯請來樂壇天后容祖兒擔任嘉賓外，繼續於台上施展渾身解數，與徐子珊辣身舞部分更愈跳愈激，加插瞓身壓子珊及扮咀橋段，令人想入非非，他更冧歌迷說：「識我嘅人都知我冇信心，但見到你哋嘅支持，咩信心都返晒嚟！」期間林峯更被熱情歌迷扯爛衫，相當肉緊。

另外，英皇高層吳雨昨日接受查小欣訪問，回應有關力捧林峯惹古巨基不滿傳聞，他笑言：「我都不滿啦，咁樣傳！」他說兩人類型不同、各有各做，又透露將開戲給基仔演出。

林峯壓住徐子珊，表現超激。

林峯

文：音樂組