陳靜寸爆犯規王 Carol：咪抽水

一連五天的動漫節正式開鑼，周秀娜、Jessica C.、甚至連Carol等也被列為知名人士禁足入內宣傳，反觀Carol死敵DaDa卻可打正旗號入場做騷，大會厚此薄彼，即惹來兩大「胸襟廣闊」的DaDa和Carol再掀罵戰，頓時令動漫節烽煙四起！

早在寫真戰中，DaDa已寸爆Carol寫真意淫，完全照Dup鹹書擺甫士，又自詡其寫真純過蒸餾水，因而引起二人連番罵戰。昨日二人縱使同場現身，可是同人唔同命，DaDa為揶揄死敵混入書展，句句咬住唔放，為早午兩場罵戰埋下伏線。

個人遊身份入場

DaDa昨早便以遊戲大使身份入場做騷，夾胸露腰出場的她意氣風發，還大派戴過的簽名手套給fans。她先表示知道很多o靚模被禁足，一直擔心自己會同一命運。對於Carol被禁入場，DaDa即得戚地大拋黎明式金句：「少咗個E神！我都係E神！仲有我喺度！」談到Carol會潛入會展，她即說：「係咩？OK啦！入嚟咪當行吓囉，我以為佢唔到！」問是否覺得Carol犯規時，她說：「佢之前都話入去啦，係咪犯規，我唔知喎！」DaDa強調自己是安守本分的人，所以今次有得入動漫節十分開心。

未幾，Carol與助手以「個人遊」身份潛入會展，大破慳囊以千多元買下李小龍figure。她先強調動漫節適合任何人士參觀，認為這樣入場沒有問題，對於自己曾講過潛入場是犯規言論，卻被DaDa捉正踩場，Carol寸寸貢說：「我冇話過人犯規，我唔想再提呢個人，畀人抽完水，自己就冇得抽水，是但啦！唔想再講！」她坦言曾為此事動怒：「我都冇回應咁多次啦，不如佢做番啲有話題嘅嘢，自己幫自己宣傳，唔好要人幫你宣傳喇！」對於DaDa自誇動漫節還有她這個E神，她說：「如果佢要獨大我唔介意。」

DaDa換過一套低胸裝，讓龍友任影。

Carol以千多元購下李小龍figure。

遭截停怒氣沖沖

上午舌戰完畢，二女下午吃過飯更具中氣，對於Carol反指有人抽水，DaDa碌大雙眼說：「我冇！佢係公眾人物，我唔係刻意提佢，只係佢三番四次提番，我只不過係以事論事，係佢自己話學鹹書擺甫士，又特登畀錢去淫審處審批，係佢逼我抽佢水！真係好唔公平，我唔係咩知名人士，做乜話我抽佢水！」她又寸Carol潛入會展雖令場面更加熱鬧，但等同犯下校規：「佢成日犯規，但佢讀咁多書，我都守規矩過佢，一陣好易畀人踢出校，嘻嘻！」

而下午再買葉問figure的Carol，對自己入場穿得密實有另一番言論：「唉！着得性感就畀人話犯規，唔性感就話冇嘢睇，真係好難做，我都想周圍行吓，但如果太性感唔使十分鐘就畀人趕喇！」但她離開時怒氣沖沖，fans更着她不要動怒，問她為何那麼激氣？Carol說：「我同助手入場時畀大會工作人員截停，問我點解落嚟？真係好唔公平，我話以顧客身份落嚟，佢就冇阻止我！」但她強調不會因此投訴。早前Carol揚言會穿上開窿旗袍進場，為免再生事端，所以只會穿普通衫入場，並強調沒有因為被禁足動漫節而影響收入。

一班性感女郎為動漫節帶來不少艷光。

Carol早前揚言會穿開窿旗袍進場，不過最後打消念頭。

採訪：專案組、名人組