米雪為尹佬樂天活下去
米雪摯愛尹志強（尹佬）年初離世，當時痛失最愛的米雪為免阻礙劇集拍攝進度，強忍傷痛投入工作，她在專訪中表示雖然當時人前表現堅強，但返到屋企即哭成淚人。米雪又謂會秉承尹佬樂天人生觀，令自己愉快生活。
現時播映中的劇集《女人最痛》，劇中的米雪演技收放自如，但其實她拍此劇時就如劇名一樣，經歷女人最痛時刻，失去摯愛尹佬，她回想那段日子，人前強顏歡笑，米雪說：「當時梗係辛苦，但都叫自己收拾心情，好在以前做過義工，處理過類似嘅事，有經驗知點處理，但都係人哋嘅事，發生喺自己身上又係另一回事。」
冇要求停工
米雪續說：「開工嗰陣梗係要硬淨，唔想影響到同事，唔想令人擔心。但返到屋企就不停咁喊，我好enjoy喊o架，喊咗出嚟舒服好多，所以當時係盡情咁喊。」米雪指雖然難關難過，但從未想過要求停工，始終公私要分明。問到失去尹佬是不是她人生最痛？她說：「唔係，生老病死係一定要面對，自己經已有晒心理準備，只可以話係人生嘅一部分。」
將苦事美化
生性樂天的米雪形容遇上比她更樂天的尹佬自然獲益良多，雖然尹佬已經離世，但她會秉承尹佬樂天的人生觀生活下去，她說：「開心唔開心都要過，咁梗係揀開心去過，我會樂天面對所有困難，遇到辛苦嘅事情，我會美化佢，呢種係我生活態度，咁會做得開心啲。」
採訪、攝影：影視組