鍾舒漫見慣世面對靚仔冇Feel
鍾舒漫（Sherman）最近忙為新書及新碟宣傳，忙到連談情說愛的時間也欠奉。Sherman坦承曾遇到意中人，惜無暇發展，她又笑稱入行後見過太多靚仔，對靚仔不再動心。
自從剪了短髮後，鍾舒漫的好運持續，去年憑《給自己的信》勇奪不少頒獎禮大獎，最近又馬不停蹄為新書及新碟宣傳。由於上張專輯反應理想，令伊人倍添壓力，她說：「今張專輯會爭取多啲自己作曲，未必話要好專業，但至少要有進步，而所有歌曲都好正面，係正能量嘅專輯。（壓力大過上次？）做嘅時候冇乜，但做完真係有，朋友都叫我要Keep住個勢，如果唔係擔心後勁不繼，但呢啲嘢預測唔到，我只係喺我能力範圍內做到最好。」
內涵重要
Sherman過往予人冷若冰霜感覺，但最近她的笑容多了，她笑稱：「以前可能繃緊啲，而且我個人向來慢熱，笑多咗都係自然流露。」由於工作忙碌，令Sherman無暇談情，她說：「之前有遇過鍾意嘅人，但唔算係拍拖，而且拍拖我都唔會死衝，會慢慢觀察。（冇時間約會？）呢排忙到冇期。（要靚仔？）入行後見得太多靚仔，依家啲靚仔唔會令我咁易動心，吸引我嘅真係內涵同性格。」
出書圓夢
另外，Sherman對首本寫真散文繪本寄望甚殷，她說：「裏面有好多自己繪本作品，算係完成細個心願。（有性感相？）最緊要啲甫士同意識令人感覺有型同充滿藝術感，好多外國模特兒影Topless，都可以影得好靚同好睇。」
場地：gi+
裙：Pink Lady
髮型及化妝：Shersher
採訪：German 攝影：沈健程