豆斗朱茵勝在夠Sexy

曾與王晶合作過的藝人多不勝數，隨便數數便有朱茵、邱淑貞、周潤發、周星馳、古天樂、徐熙媛等。雖然晶哥一手捧紅過無數藝人，但相信大家印象最深刻的，還是張家輝。家輝現時貴為影帝級演員，昔日亦曾浮沉影圈多年，在其尚未發光發亮的日子，晶哥確是不離不棄找他拍過不少電影，包括《賭俠1999》、《千王之王2000》、《黑馬王子》、及《我老婆係賭聖》等，而家輝在該批作品中亦有不少突破性的演出。

家輝可塑性高

問到晶哥會否覺得是自己一手捧紅家輝，他卻不以為然謂：「唔可以咁講，其實我覺得家輝嘅可塑性好高，因為佢本身個人唔會太impressive，變咗啲人會記得個角色，而唔係佢個人。好似梁朝偉咁，好難重新打造一個截然不同嘅梁朝偉，因為佢嘅外形太強。同張家輝合作咁多次，我覺得佢好有自我嘅立場同堅持，知道自己想做啲乜唔做啲乜，有時佢直情會問我點解嗰個角色唔搵我做，仲同我講話唔想再玩啤牌喎。」

令到不少演員走上成功之路的晶哥，笑指演員要成功最主要是認識內在真正的自己及潛能，否則便很難有足夠信心去演繹角色，他笑指當年邱淑貞及朱茵雖然成為經典sexy icon，但當年要游說二人行性感卻一點也不容易：「邱淑貞同朱茵真係好有sexy feel，其實我覺得性感同大胸係無關係，夏文汐都好性感o架！而要游說佢哋行性感，最緊要係畀到安全感佢哋，講明想點拍，拍出嚟後佢哋過唔到自己嘅，我就剪咗佢。」

唔會駕馭演員

晶哥更為周星馳及發哥平反：「啲人成日話星仔難駕馭，首先我想講我唔會駕馭演員，電影係集體藝術，演員係要carry導演嘅idea，但導演嘅只係rough idea，如果你嘅idea出嚟好嘢嘅，都OK架！講真，我同星仔合作咁多次都無事，佢最多可能有態度嘅問題，但其實專業嘅演員個個都難搞，十全十美嘅就唔會係好演員。至於發哥，亦係好平易近人同無得頂，啲人成日話佢要住乜酒店物酒店，要求高，但我覺得即使係咁都好reasonable，你搵得人做嘢梗係要遵照人哋規矩架啦。」

文：影視組