劉璇初試啼聲頂硬上

劉璇加盟星娛樂將於11月出碟，請到李偲菘作曲兼監製，她坦言大感壓力：「第一次同老師合作，佢教識我好多嘢，不過自己好緊張，我叫老師對我嚴格啲，唔希望打爛佢招牌，好擔心自己唱唔到佢要求，又驚佢會覺得我唔係專業歌手，就算我唱得麻麻哋都放我走！」

要學懂感情釋放

不過，經驗老到的李偲菘絕不馬虎，不但對璇璇有要求，更傾囊相授：「老師叫我唔使擔心，一定唔會畀我打砸招牌，佢好識控制我情緒，當我唱得唔好，佢會叫我唔好心急，好好休息，老師話我把聲比較低平，要加強練習，學懂感情釋放，因為其實我只係學過幾堂唱歌，（咁點解有信心出碟？）哈哈，我都唔知點解，不過老師讚我把聲有感情。（怕唔怕唱live走音？）唔怕，之前體操都試過失敗，最緊要有膽唱，唔可以驚唔可以怕，正面批評有幫助，走音、破音唔緊要，最緊要投入唱到感情。」

而主打歌《往事剪接手》可以說是她的寫照：「依家生活同以前唔一樣，以前係運動員，好堅強，依家轉變做主持、唱歌、拍劇，諗番以前嘅回憶片段，有開心有唔開心。」

採訪：音樂組

化妝：Leo Lam

髮型：Annie g Chan

服裝：Li Jin

場地：Cucina@香港酒店