張舒雅Hea夠從模出發
有「Hea爆港姐」之稱的張舒雅，受爺爺過身打擊，在美國匿埋放逐自己兩個月後，終於想通想透，決定「復出」做model，由王友良為她打造港版杜鵑和富永愛混合體闖模界。
張舒雅過足兩年Hea爆生活，期間曾幫屋企人打理珠寶生意，又報讀理大的設計課程，自我增值，爺爺過身對她造成打擊，早前她前往洛杉磯出席妹妹的畢業禮後，在美流浪兩個月，突然間想通了，不想再Hea，回港後由父親和胞兄的公司為她處理工作，並與王友良簽約成為合作夥伴。
報讀學位課程
王友良揚言不擔心張舒雅再「Hea」，更代她解釋：「佢話過去一年唔係唔想做嘢，只係冇適合嘅工作畀佢做，佢一直等緊，依家佢係『Hea后』發憤，之前喺理大讀設計，最近又報咗個大學學位課程，遲啲會一邊做嘢，一邊讀書。（擔心佢詐病推job？）我同佢開過幾次會，都好準時，叫佢交資料，都係準時交齊，覺得佢好有責任感，好生性。」
傳復出因情變
他又讚張舒雅有身高、有家教，兼且是港姐冠軍，具有潛質，適合行High Fashion，故不會接內衣及泳衣騷，他說：「佢可塑性好高，希望做到杜鵑和富永愛嘅成績。」對有傳她復出因為與補習天王趙永康感情亮起紅燈，王友良表示她只會專心工作，不提感情事。
文：名人組