Stephy財色兼收：大家都開心

Stephy昨日與鄭融、周柏豪、謝安琪、陳鍵鋒及農夫出席活動，她透露下月與小方返內地拍劇，問到會否增進感情？她甜笑地說：「我哋好投入工作。（財色兼收？）嘩！講到咁點答呀？總之大家開心有呢個機會。」Stephy大方透露兩人住同一酒店，問到是否同房？她說：「其實我個人好獨立，大家唔好諗太多。」

鄭融閉關進修

Stephy又稱不擔心被內地傳媒追訪，更向記者說：「唔好過去喇，嗰度好熱同好辛苦。（怕被影到十指緊扣？）唔會。」有傳她十月與小方拉埋天窗，她笑謂：「要拍劇結唔成。」對於死敵傅穎日前獻唱時玩自摸，Stephy說：「有睇報紙，都幾激同好性感。」

同場的鄭融日前現身林峯個唱，問到是否去支持做幕後的男友莊冬昕？她說：「我公司有份參與呢個演唱會。（支持莊冬昕？）都係。」半年沒有露面的她原來去了進修，問到怕不怕被人誤會再遭唱片公司雪藏？她說：「啲人點諗唔介意，最緊要出碟時，大家知道我擺咗幾多心機落去。」另外，周柏豪的緋聞女友鐘浠文擔任林峯個唱模特兒，他對此說：「佢好性感呀，喺微博見到佢好瘦。」

陳鍵鋒（左）與周柏豪搞gag，令鄭融哭笑不得。

農夫以一貫搞笑形式出席活動。

文：音樂組