法拉事業起飛爭視后 病佘睇化
陳法拉今年拍劇、唱歌雙線出擊，有力追上佘詩曼爭奪視后寶座！身在橫店拍劇的阿佘無懼被挑戰，直言已睇通睇化，而法拉則人紅多是非，昨日出席活動時力撐冇與劉璇不和，二人戲裏戲外都是好姊妹。
佘詩曼被視為今年視后大熱，其主演的《公主嫁到》為台慶劇之一，不過亦非全無對手，今年「升呢」成為一線花旦的陳法拉，早前主演的《蒲松齡》大受歡迎，加上今年兩部台慶劇《公主嫁到》和《巾幗梟雄之義海豪情》都有份演出，演技備受不少監製讚賞，絕對有力挑戰無綫一姐佘詩曼，爭奪視后寶座！
大讚對方勤力
最近阿佘和郭晉安在橫店開工，對於法拉這位競爭對手，阿佘有讚冇彈，她說：「佢係一個好nice嘅女仔，做嘢好勤力。（擔唔擔心攞唔到視后？）每年都講一次，其實攞唔攞獎我都冇所謂，只希望演好每個劇本。」橫店的氣溫高達39度，據知有近十名劇組人員集體患上感冒，阿佘亦不幸中招，近日已返港醫病，而郭晉安亦有輕微中暑現象，他說：「試過熱到企唔穩，今次係我第一次為拍劇剃光頭，阿佘親自操刀，佢話好好玩。」
與劉璇好姊妹
而法拉昨日穿上一襲低胸裙現身Acca Kappa新店開幕，表現風騷的法拉大騷事業線，笑言不敢烏低身，但不擔心男友會投訴。早前有傳她與劉璇為拍《女拳》爭戲份而鬧不和，她說：「佢個人好sweet，好似個小妹妹，同我戲裏戲外都係好姊妹。（有冇交流歌藝？）未有機會，等我問佢拿番隻碟聽先。」她透露將會錄歌準備出碟，但不會走性感路線，並強調男友非老闆。
而同場的黃浩然就笑言多得法拉帶挈賺外快，並希望愈做愈好，每一個角色都令觀眾留下深刻印象。
文：專案組