阿倫草蜢大玩破處車震

草蜢紀念今年入行廿五周年，將於十月廿三至廿六日假紅館舉行四場「25草蜢演唱會」。為隆重其事，昨日三名「草蜢佬」穿上西裝、打煲呔出席記者會，又請合作無間的廿五位舞蹈員上台，陪他們唱草蜢版《愛的根源》。

捉錯路唔襯打扮

自詡「年年廿五歲」的阿倫，特別gel頭、潮裝扮後生仔到場，但他上台即投訴：「我怪你哋（草蜢），諗住襯你哋，我個頭set到好『行』，只係落雨『滋潤』咗少少，你哋又着晒西裝，我仲以為去錯地方。」阿倫送上冰雕鑲身份證的擺設，他笑說：「『銀禧人』先有『冰鎮身份證』，『銀禧人』入會，年年『lock』住廿五歲。」蔡一智（智仔）問需否作破冰儀式，但蔡一傑（傑仔）則笑問：「唔係破處？」阿倫「接力」說：「呢個同『車震』無關。」因傑仔錯手開快了香檳，阿倫又揶揄：「後生仔即係後生仔，咁急。」蘇志威邊手執香檳要阿倫幫手開瓶，邊說：「呢啲你有經驗呀。」阿倫報以邪笑。

草蜢將獨一無二印有25的T恤送給阿倫。

草蜢邀請合作無間的廿五位舞蹈員上台合唱。

爆曉風唔使會考

草蜢表示三個「麻甩佬」組合可唱足廿五年實在難得，今次演唱會有一環節唱廿五首陪住他們成長的經典金曲，傑仔說：「會唱師傅梅艷芳、張國榮、羅文、陳百強、阿倫等嘅歌，我哋考慮網上投票，收集歌迷想聽咩歌。」

另外，阿倫、Mr.及陳奐仁在黑雨警告下出席「太陽計劃會考放榜打氣大會」，阿倫自爆囝囝曉風因為讀國際學校，所以不用會考，他又聲稱自己當年讀書成績好，但好友彭健新卻是留班生。

採訪：音樂組