林峯抓頭：問導演啦

林峯前晚再度開騷大玩火辣場面，請來陳慧琳、徐子珊、王祖藍及吳卓羲擔任嘉賓外，又與性感女dancer大跳辣身舞，讓台下女歌迷又羨慕又妒忌。安哥時段，舞台落下白布播出林峯與港姐MV，當畫面出現港姐號碼時，觀眾席即發出噓聲，但座上客的港姐未受影響，繼續欣賞MV。

唔識唱鍾嘉欣歌

林峯於台後接受訪問，同時為新專輯銷量達白金唱片報捷。他指個唱上字幕機曾出現問題，自爆記歌詞差，笑自己是「校長第二」。提到港姐被噓，林峯表示：「淨係聽到好大聲。（考慮cut咗嗰part？）問導演啦，但咁我咪換唔切衫？」經記者再三追問，林峯求饒地說：「唔好逼我啦，我冇睇過條片。（特別為個唱拍？）係啩，係首播。（有港姐號碼同名喎！）係咩？咁我出嘅時候有冇名o架？」

準港姐李雪瑩（右起）、馬鈞怡及李文煊齊來支持林峯個唱。

林峯個唱播放與港姐合拍的MV。

問到為何沒有選擇唱緋聞女友鍾嘉欣歌曲？林峯說：「我唔識佢啲歌，自己係所有女仔歌都唔熟。（有冇買佢碟？）佢都冇送畀我！」再問有否邀請嘉欣睇騷？他只說：「公司好多同事都有請，冇兜口兜面囉。」

徐子珊拒用缽仔糕

提到有澳門歌迷透過陌生人買飛被騙財，林峯說：「如果我有飛都想畀佢，大家應該從正途買飛，自己好唔鍾意唔係真正鍾意我嘅人得到我嘅簽名、門票牟取暴利，大家要我嘅簽名可以去活動，想見我可以加入歌迷會。」

另外，擔任嘉賓的子珊表示：「減咗五磅，真空上陣o架！冇加『缽仔糕』。（唔驚走光？）做足安全措施。」早前有傳子珊所屬的唱片公司需重整音樂部，她言已與唱片公司約滿，現在一切交由經理人公司無綫處理。

文：音樂組