樂基兒放低身份服侍衞蘭
衞蘭（Janice）被指小師妹JW被力捧而受冷落，但原來其得寵程度仍然高企，連老闆娘樂基兒（Gaile）都紆尊降貴，親為Janice揀選個唱靚衫，又「御准」她開懷大嚼，難怪Janice全程展示勝利笑容。
黎明新寵JW隆重登場後，外間指大師姐Janice被打入冷宮，可是昨日在尖沙咀的Juicy Girl時裝店，巧遇Gaile和Janice孖住揀衫，Gaile自動報料說：「Janice 10月喺紅館開兩場演唱會，我幫佢做形象，所以相約一齊揀歌衫。」
掃完貨孖住狂擦
Gaile揀衫時比Janice更為落力，快手地揀了一大堆型格十足的潮衣及高跟鞋。到試衫時，Gaile頻頻踎低為Janice整理衣鞋，Janice如公主般享受老闆娘的貼身服侍。
揀完衫後，二人又前住歎下午茶，Janice想叫致肥食品天婦羅，錫到Janice燶的Gaile點頭說：「唔使咁快減肥，太早減反而到開騷前仲易忍唔到口。」
問Gaile對於Janice失寵傳言，她表示：「我哋個個都錫，JW因為要出碟，所以先多啲宣傳，但依家Janice開演唱會又會將focus放係佢身上。」同是幫JW搞形象的的Gaile，被問到JW被批衣着老土？Gaile說：「一件衫，可能有999個人覺得靚，只有一個人覺得唔靚，衫唔係大問題，歌手最緊要係唱歌要好聽。」
無綫幫手捧JW
另外，無綫自和四大唱片公司「擘面」後，頻向有實力的歌手示好，據知無綫有感林峯和Janice今年齊得「全年最高銷量本地男/女歌手」獎，故力邀Janice擔任林峯個唱嘉賓，同時JW的「掛念好友音樂會」，無綫除在《東張西望》播出訪問片段外，周六在J2台亦會足本播放。
採訪：音樂組