江若琳冒死曼谷血拼
曼谷發生爆炸導致人命傷亡，身在當地的江若琳（Elanne）冒險往市中心搵食及逛街，心情未受影響，不過她一度失蹤令師弟James及Gary嚇破膽！
Elanne前晚為彭發新片《索命童話》拍攝煞科戲，至昨晨七時才收工，原打算返酒店就寢，未幾即被親友傳來的短訊聲吵醒，大家同樣為曼谷的爆炸事件而擔心她的安危。
冇回覆嚇壞師弟
昨日Elanne在長途電話中說：「最緊張係媽咪，千叮萬囑叫我除咗工作之外唔好去街，依家走剩得我一個演員，心情好灰。」同片的James及Gary趕及在爆炸發生前返港，有感事態嚴重不斷SMS給師姐了解情況，惟她遲遲未有回覆，嚇得二人轉向經理人公司「求助」。
見黑膠袋兜路走
據悉，Elanne昨仍留守曼谷，等候導演彭發通知是否需要補戲，預算最快明日才返抵香港。百無聊賴下，昨午她在當地工作人員陪同下，一行十餘人前往市中心食午飯及買手信打發時間：「佢哋話今日（即昨日）係泰國佛誕，係一件盛事，冇人會喺今日搞事，所以我出去都好安心，果然街上市面平靜，淨係喺街度見到啲不明黑色膠袋，先即刻兜路走囉，以策安全嘛。」
Elanne為免影迷擔心，在微博內向大家報平安：「由於我們在偏遠郊區拍攝，起初沒有人知道發生何事，看了（報紙）頭版才嚇了一跳。原來我們是三千名陷入險地的港人之一，不過我們沒事，大家不用擔心！」
文：影視組