栢芝帶Quintus歎茶 拉姑谷肥孫

栢芝與拉姑屢被指婆媳不和，但兩人一於好少理，感情依舊十分好，昨日，兩婆媳便拉隊到中環置地歎茶，除大仔Lucas，出世兩個多月的Quintus亦有隨行。首次「公開亮相」的Quintus，肥肥白白，眼仔碌碌，樣子依舊像極父親霆鋒與爺爺四哥（謝賢），十分趣致可愛。而歎茶期間，栢芝與拉姑更分工合作，栢芝負責照顧Lucas，拉姑則為Quintus餵奶，默契十足！

重16磅食飽就瞓

眾人樂也融融之際，剛巧呂良偉與太太楊小娟亦在該處歎茶，呂良偉夫婦跟栢芝寒暄，栢芝與楊小娟還密密斟，估計是大談湊仔經，兩人更交換電話，之後呂良偉夫婦先行離開。

栢芝與拉姑歎完茶後，亦齊齊離開餐廳。栢芝被問到Quintus近況，她笑言：「佢好乖，依家十六磅幾，食完飯就瞓覺，夜晚好少扭計。」拉姑則向記者大讚栢芝收身成績好，笑言：「栢芝瘦咗好多。」然後，Quintus由外籍工人及司機保護下離開，栢芝、拉姑與鬍鬚Kong則帶着Lucas繼續行街shopping。

一家人歎下午茶，栢芝照顧Lucas，鬍鬚Kong及拉姑湊Quintus。	拉姑幫手餵奶。	Quintus飲完奶，拉姑為他掃風。

嫲嫲為乖孫置裝

關係甚佳的栢芝與拉姑，步行去太子大廈時，更手挽手、雞啄唔斷笑着談天，以行動打破不和傳言。當到達太子大廈後，拉姑與鬍鬚Kong到童裝店COMME CA ISM幫Quintus買衫，看拉姑落足心機，左挑右選，為Quintus搜羅漂亮BB衫，可謂錫孫錫到燶。栢芝則帶Lucas行玩具店，行到咁上下，栢芝想帶Lucas去搵嫲嫲，但Lucas去到童裝店即扭計，所以栢芝再帶Lucas去玩，待拉姑買完衫後再會合離開。栢芝、拉姑齊齊拖着Lucas準備去搭車時，期間拉姑想再去逛時裝店，但因Lucas不想，拉姑即順從孫仔意思，一起打道回府。

栢芝每次被傳媒發現跟囝囝出街，都會被追訪，問栢芝可會介意？她說：「喺呢行都一段日子，明白傳媒嘅工作需要，亦唔會太在意大家寫啲乜嘢，但只要離遠啲，唔好影響同傷害到小朋友，都可以接受。」

栢芝抱住Lucas一齊行街街。	拉姑挑選靚衫。	Lucas看中這架三輪車，立即試踩。

採訪：影視組、追蹤組