陳茵媺挾詠春底趕功夫熱
功夫熱席捲全城，想不到港姐出身、說話嬌聲嗲氣的陳茵媺原來都是打得之人，她透露讀書時曾跟表哥學習詠春，雖然只懂皮毛，但仍希望憑一招半式打出名堂、開闢新戲路！
陳茵媺（Aimee）自從剪了一頭清爽短髮後，工作運不斷上升，去年獲無綫頒發「飛躍進步女藝人」獎，今年又有機會與視后李司棋合作扮演母女拍處境劇《天天天晴》。Aimee十分期待與司棋姐的合作：「第一次同司棋姐合作好開心，佢做我後母，劇中嘅我有啲任性，鍾意周圍抗議推廣環保訊息。（怕唔怕做得唔好畀前輩鬧？）唔驚，我唔會遲到，而且自己中文唔好，好多前輩都樂意教我。」
未奢望稱視后
有機會與好戲之人合作來磨練演技，但Aimee未敢奢望能登上視后寶座：「希望係有，但始終入行經驗淺，唔敢畀太大壓力自己，寧願拍多啲戲令自己更進步。」Aimee表示最希望可以登上大銀幕，並以打女揚名：「依家功夫片咁hit，我都好想拍一部武術電影，覺得好有型！其實我喺加拿大時跟表哥學過詠春，擺pose都似模似樣。」
與弟弟傾唔完
此外，已有三年無放長假的Aimee，早前終於有機會返加拿大三星期探望屋企人，她直言最開心見到細佬：「每次都係Daddy、媽咪嚟香港探我，反而有三年冇見過細佬，大家又好少傾偈，覺得呢個家姐好唔啱。」難怪兩姊弟一見面即有講不完的話題：「細佬剛啱大學畢業，我哋一齊去市區行街，仲送咗啲飾物畀佢，最唔捨得係喺機場一刻，一家人喊到收唔到聲。」
文：專案組
攝：馬永堅
服裝及場地：CHARCOAL