陳山聰只愛靚衫揚言唔生
早前被拍得與女友逛街的陳山聰，氣憤伊人被指「中女」，雖然二人拍拖十年，但山聰揚言唔會生仔，更笑言靚衫比下一代更重要。
陳山聰近年一劇接一劇，以前一向多演奸角的他，變為多演搞笑、傻仔角色，最近播映的《施公奇案II》中飾演高級捕快，山聰說：「套劇第一集收視就平均有卅三點，我哋真係好開心，套劇拍咗兩年，我同Bobby（歐陽震華）都好心急想推出，今次呢個捕快角色可以話係我喺無綫十年以來最多戲嘅一個，所以好期待。」
增肥做皇帝
以前山聰都演過不少奸角，不過近排多了不少傻兮兮角色，他笑言：「自從拍《律政新人王2》後，監製知我原來係傻嘅，其實我可以做傻仔。」之後，山聰將要在另一套新劇飾演皇帝，監製就勒令他要增肥，他說：「最衰平時我跑慣步，慣咗又唔可以唔跑，平時一星期跑四日，依家咪跑少兩日囉！最多跑完食番多啲嘢，狂食雪糕。」
媽媽唔逼婚
早前與山聰拍拖十年的女友曝光，更指二人好事近，對於有指其女友是「中女」，他就謂：「梗係激氣！邊似呀！（有冇搵你出氣？）冇！佢都明白，佢都識唔少我哋呢行嘅朋友。」不過山聰又否認快結婚，更表示現時是搏殺期，更斷然就算結婚都不會生小朋友：「唔生啦！絕對唔會，因為女朋友唔鍾意小朋友，我哋又鍾意四圍去。」向來喜歡買衫的他更表示：「可以咁講，對我嚟講，衫係重要過BB，我阿媽好開通，冇逼我，仲話唔結婚可以同居添！」
文：影視組 攝：鄭家俊
化妝：Raymond Yip
場地：Hair（又一城）