汪圓圓MJ上身又剝又摸
已故一代巨星Michael Jackson，其於世界各地仍有不少癡心fans不時模仿偶像表演，身為MJ fans的汪圓圓，前晚為慈善活動首度公開扮MJ表演舞技，憑一招自摸下體及除衫，睇到全場觀眾「嘩嘩」聲，更獲得「女版MJ」美譽。
汪圓圓前晚為「微笑行動慈善晚宴」擔任表演嘉賓，以一身經典MJ打扮在台上現身，大跳MJ經典舞步，當她跳到自摸下體的動作時，全場觀眾歡呼大叫，再加上除外套動作，更帶動全場高潮，連台下的關之琳亦看得十分興奮。
畀自己九十分
原來為了今次表演，圓圓專程向郭富城的排舞師Sunny Wong拜師學藝，圓圓說：「我一直好鍾意Michael Jackson，佢突然走咗我都好sad！所以想跳佢嘅舞向佢致敬，香港都好少女仔扮佢，我諗咁樣幾好玩。今晚嘅衫全部係我準備，不過練習嘅時間唔多！之前就去咗Sunny Wong排舞室練習兩星期，本來都好緊張，好彩都順利完成，我畀自己90分啦，因為有啲緊張，所以要扣自己分。」
姐夫捐錢支持
而今次表演，家姐汪詩詩及姐夫甄子丹亦有份捐錢支持，圓圓說：「佢哋去咗度假，不過就有捐錢，數目唔方便講啦，總之好多朋友都有支持我，最驚喜係表演完佢哋上台獻咗好多花畀我！我事前一啲都唔知。」
文：名人組