張智霖買車唔請示靚靚
張智霖昨日出席平治SLS AMG媒體發布會時，透露年輕時熱愛鍊車︰「廿幾歲年少氣盛，依家就安全為主。」他更笑言愛在YouTube睇交通意外片段來警惕自己。當記者問他會否與好友郭富城交換車揸時，他就耍手擰頭說︰「我身邊朋友都好鍾意車，但就唔會交換揸。（學城城參加賽車？）下月喺上海有慈善賽車，我第一個就報名，我都想有落場賽車嘅感覺。」他又坦言渴望擁有最新的平治SLS AMG鷗翼跑車︰「成三百二十萬，要考慮吓，係我今年目標。（買車使唔使請示靚靚？）唔使，我平時唔會用好多錢買衫同食嘢，買車係我唯一嗜好！」
同場的謝婷婷坦言享受揸車過程，卻不愛揸快車︰「我喺香港就唔享受揸車過程。其實我都嘗試過揸快車，但腳會震，可能嗰時年紀細。」
另昨晚平治新車舉行派對，邀得賭王何鴻燊千金何超盈、黃佩霞、張天愛等出席，何超盈提到父親早前入院做身體檢查，報告顯示非常理想，醫生表示有九十幾分，故何家各人也很放心，她說：「爹哋鍾意行花園，又鍾意食水果，會叫人去日本買桃畀佢食。（同爹哋去旅行？）未住，自己想去日本，睇下爹哋想唔想。」