阿倫剝衫搞癲歌迷
譚詠麟（阿倫）昨晚舉行紅館演唱會，早前為個唱而搏命做運動減肥的他果然見效，更毫不吝嗇在台上「寬衣」大騷肌肉，惹起不少女歌迷歡呼狂叫：「不如唔好着啦！」
阿倫一共八場的《譚詠麟2010再度感動演唱會》昨晚假紅館正式開鑼，三面台全場爆滿，草蜢三子專程往捧場。阿倫率先以閃爆的米高積遜（MJ）的經典造型示人，更倣效MJ其中一場演唱會的設計，於舞台中央的升降樓梯登場，全黑上陣的阿倫身形明顯操fit不少，連唱三首歌曲，現場歌迷舉起螢光棒支持，非常熱鬧。
阿倫笑言：「當年喺大球場搞細細聲演唱會，唔能夠盡興，今晚可以玩盡啲！」期間，阿倫在台上公然換衫，操fit不少的他毫不吝嗇大騷身材，惹得台下歌迷嘩鬼叫，更瘋狂要求阿倫剝光豬：「好大呀，不如唔好着啦！」阿倫笑笑口未有理會，換上灰黑色的西裝褸繼續唱歌，令不少港女失望。
着蘇格蘭裙仔
阿倫隨後換上另一套火紅色的舞衣，以蘇格蘭裙仔加閃閃珠片褲大唱《酒紅色的心》，原來昨日大有意義，他說：「今日（即昨日）開騷好有意義，因為今年藝能（經理人公司）廿五周年，哈哈，我仲話自己廿五歲，原來唱咗廿五年歌，無論你係80後、90後定千禧後，大家都係廿五歲！」另外，阿倫昨午到達紅館準備期間，將一張送貨工人造型的相放上微博，而他的牙醫朋友特地送上一大籃荔枝。
採訪：音樂組