劉青雲集體中招怪菌襲眼
向來擅拍鬼片的彭氏兄弟，戲裏戲外竟也十分邪門。近日彭發在泰國拍戲時，竟發生集體「中招」事件，全體演員包括劉青雲、傅嘉莉等全因眼痛要入院求醫；當中只有江若琳僥倖逃過一劫。不過江若琳接受長途電話訪問時，表示在當地同樣遇到怪事。
劉青雲和江若琳主演的電影《完美童話》目前正在泰國拍攝，不過本周二卻發生離奇集體入院事件，同片大部分演員包括劉青雲、盧惠光、傅嘉莉、Square等，全部在同一日內因眼疾問題入院求醫，而且中招原因說法不一，當地醫生指有可能是受紫外光刺激或細菌感染，導演彭發卻歸咎於殺菌燈，認真離奇。
事發當日氣溫高達四十度，劇組於荒山廢屋取景，劉青雲、盧惠光、傅嘉莉、梁俊一與Square的James、Gary均有份拍攝。當日眾人在荒野暴曬整天，晚上則要進入解剖室拍攝另一場口。
彭發不覺邪門
當眾人完成拍攝在酒店休息時，有演員發現眼部突然紅腫兼淚流不停，其後多人均出現類似情況，尤以Gary最嚴重，雙眼腫得睜不開。當時梁俊一提議召白車入院，事件因而驚動彭發。
彭發憶述當時情況說：「我估係因為日頭曬得耐，夜晚又要曬殺菌燈所以出事。最搞笑係佢哋去醫院時打畀副導演諗住叫佢幫手打點，點知原來副導演都中咗招，好彩拍嗰陣我喺車入面所以冇事。但當時我都好驚，所以就打畀啲演員，第一個打畀劉青雲，當時佢話隻眼好痛，於是我哋就成班約埋去醫院，大家食咗藥同搽咗藥膏就好快好番。」問到彭發是否覺得自己拍的戲很「邪」？他即嚴肅謂：「邊有咁邪呀！」
江若琳被反鎖
身在泰國的青雲則報平安，指眼睛情況已好轉，並笑謂全靠所戴的「眼鏡」救回一命：「好彩造型要求我戴眼鏡，隔咗一層所以冇其他人咁嚴重。我滴咗眼藥水已經冇事，多謝大家關心。」
至於幸免於難的江若琳（Elanne），於事發當天才抵泰國，避過一劫，昨日她說：「梗係好擔心啦！青雲係我偶像，一仔係我朋友，Square又係我師弟……我都有逐一慰問佢哋。」
談到在泰國有否遇到怪事，她猶有餘悸說：「我第一晚到嗰陣就反鎖咗喺間房入面啦！當時我諗住打開道門出去，點知開咗廿分鐘都開唔到，當時我嚇到成身標晒冷汗，最後打電話落大堂搵人上嚟救我。」Elanne又指之前拍《童眼》時亦怪事連連，兩個同事疑撞鬼，作為基督徒的她每次出trip都會帶《聖經》和十字架求心安。
採訪：名人組、影視組