Vibeke獨孤一味享受做宅女
新八模成員馬卓寧（Vibeke）雖然已做Model一段時間，但依然保留踏實的心，自認悶蛋的她覺得送花太奢侈，而最浪漫的一次經歷竟是一次單身旅程！
有「翻版關心妍」之稱的新八模成員Vibeke外表斯文，但內心絕不Open，自認是悶蛋的她說：「我可以幾日唔出街！餐餐都叫同一款外賣！」她表示喜歡與男友安守家中，甚麼地方也不去，已覺得十分滿足，果然夠「宅女」！
送花唔實際
問到對於浪漫的看法，為人實際的Vibeke答案亦很正路：「我唔鍾意堆砌浪漫，唔稀罕收花，花要種喺花園入面o架嘛！幾日就謝你話幾無謂！」Vibeke喜歡的是自然，最難忘一次是人在芬蘭，在零下十度的氣溫下，看着滿布星星的夜空，享受一個人的浪漫：「嗰排我同當時嘅男友熱戀中，但因為工作要自己去芬蘭，有一晚見到成個天空都係星星，好浪漫！我咪幻想男友喺我身邊囉！」
霎眼火花對Vibeke來說太不切實際，要奪得美人歸始終要靠時間，她說：「我都信第一眼嘅眼緣，不過之前啲男友都係一齊工作，自自然然就日久生情！」
對感情認真
曾經歷五次受愛情創傷的Vibeke自言不再天真，現在是單身的她對感情事非常保守，亦不易打開信任之門，即使是相識十年的朋友亦不能幸免！她說：「有個朋友識咗十年，一直好少聯絡，有日佢突然約我單獨出街，我覺得怪而推咗，可能呢個性格令我錯過好多姻緣！」她又指曾在工作中結識一位異性，對方突然透過SMS向她示愛，嚇得她不敢再回覆對方！
文：立 攝影：黎志輝