一級方程式（F1）賽車手畢頓早前與日籍混血名模女友道端Jessica分手後，前日被影到約會食壽司，盛傳火速復合，未知會否像隊友兼同鄉咸美頓般乘機求婚呢？
剛在周日F1家鄉英國站跑第四的畢頓，賽後即晚約會舊愛道端到倫敦Roka壽司店撐枱腳。穿上黑色超短迷你裙的道端明艷照人，兩人離開時雖冇親密舉動，但燦爛笑容一致，亦不介意被狗仔隊追訪，看來復合在望。兩人於五月時因長期異地分隔宣布分手，消息人士指他們掟煲後卻一日不見如隔三秋，反而更掛念對方，故大有機會分手兩個月便極速翻撻。
畢頓日前比賽雖然屈居第四，但自言是其賽車生涯最精彩的表現之一，不過隊友「黑帝」咸美頓比他更出色，以第二名衝過終點。而咸美頓與Pussycat Dolls成員Nicole Scherzinger的戀情亦比畢頓的進展更神速，兩人於二月情變後，僅數星期便高調翻撻。Nicole經常到賽車場為男友打氣，二人戀情更突飛猛進，咸美頓正計劃向Nicole求婚，知情人士說：「咸美頓呢幾年成熟咗唔少，佢好清楚想點及同邊個一齊，佢哋經歷過低潮，但佢認定Nicole係真命天女，想同佢長相廝守。佢一直都想喺英國求婚，對佢嚟講好有意思。」
Nicole周日則暫代患了瘧疾的Cheryl Cole做歌唱節目《X Factor》客席評判，更得另一評判Louis Walsh芳心，連Simon Cowell亦很妒忌。
文：外娛組