Mikki大女人外遊飛男友

Mikki和Jocelyn Luko昨日為「Marc Jacobs 2010秋冬時裝預展」演繹最新服裝，Mikki展示全場最貴、價值92,900元的大褸。而Jocelyn演繹誘人Deep V連身裙外，Mikki以露背裝示人時，不慎露出nude bra。

拒叫老公老婆

自言工作檔期已排到十一月的Mikki，打算抽時間去旅行充電，但不會和男友Sunny同行。她說：「我想自己去，或者同女性朋友去，因為佢要返工，請唔到假，我想自己一個人匿埋，好舒服。（擔心獨留港嘅男友曳曳？）我好放心，有個男性朋友，但凡Sunny食咩飲咩都寫上Facebook，我一睇就知。」Mikki笑言如男友獨自旅行只可去埃塞俄比亞，「有靚女嘅地方要同我一齊，（你係咪好大女人？）係呀，有少少。」

現在和男友「分居」的Mikki，直言如果再同居，就是結婚之時。她說：「我係講畀所有男士聽，唔只佢，我一個人住得好開心，單身幾開心。（分開住多男仔追？）冇，但刺激吓都好。」她續說計劃一兩年後才結婚：「最重要係搵到啱，如果唔啱，有錢都冇用。」Mikki更羨慕Jocelyn有幸福的婚姻，她說：「每對couple都會以老公老婆相稱，但我一定唔會喺公眾場合咁叫，覺得好老土，我哋平時以阿哥阿姐相稱，其實我哋係兄妹。」

四年後生BB

至於被Mikki羨慕的Jocelyn說：「我花咗好多時間去搵Mr. Right，曾經出現好多令我開心嘅人，但當我遇上老公時就知搵啱咗，對眼都睇唔到其他人。」她續說因想享受多點二人世界，打算四年後才當母親。她說：「一生BB就會退出返夏威夷，但我好愛香港，所以都想返嚟。」

Jocelyn演繹誘人Deep V連身裙。

穿性感閃閃晚裝的Jocelyn，夠高貴。

文：名人組