濕身祖兒享受海豚索吻
屬於單身一族的容祖兒，被「鹹豬嘴」都竟然大表受落，原因「牠」是活潑好動的海豚，祖兒接受挑戰下水與海豚跳舞及暢泳，更形容是一生人難得的機會。
祖兒早前到菲律賓蘇碧為百老匯拍攝廣告，廣告中她要上山下海，繼在森林闖高空吊橋、之後又與猛男打沙灘排球，今次就挑戰難度落水與海豚暢泳共舞。拍攝期間，海豚熱情地飛身撲向祖兒咀嘴，雖然被「鹹豬嘴」，但祖兒相當受落，她笑說：「一生人好少有機會同海豚親吻o架，人一世物一世點都要試吓。」
祖兒在導演安排下又跟海豚碧波暢泳，感覺舒暢，她笑說：「佢哋好勁，真係識得跳舞，跟我擺晒舞姿，真係拍得好開心。」兩隻海豚相當活躍，不停水花四濺，搞到工作人員濕晒身，還要跑上跑落替祖兒補妝。
馬匹搞鬼唔受控制
除了有海豚作伴，導演又安排祖兒騎馬，她笑說：「隻馬係菲籍，我跟佢講英文，佢好似唔識聽，有啲難控制，叫佢行左佢就行右，好搞鬼囉，好彩有人教我講一啲簡單菲律賓話嘅指令，我先冇摔下來。」她笑言今次廣告有「三多」，包括出汗多、動作多及動物多！
否認收鑽石鏈續約
此外，有傳英皇老闆楊受成親自出馬跟祖兒洽談成功續約，楊生即送上在拍賣會投得的一條四千萬鑽石鏈給祖兒，祖兒經理人霍汶希否認說：「冇咁嘅事，祖兒同公司都未滿約，之前已經傳蔡卓妍、阿嬌同公司約滿，全部都唔啱，佢哋個個都仲係合約期內。」
文：音樂組