周秀娜內衣出巡峰魔宅男

距離寫真戰尚有一周，o靚模大混戰逐步升溫，周秀娜（Chrissie）昨日聯同師妹新八模成員Betrys（江怡）、Mia（陳靜儀）、Hazel（徐熙素）、Hidy（余曉彤）、Jeana（何佩瑜）、Suki（黃雪瑩）、Rika（王麗嘉）和Vibeke（馬卓靈），在商場參與Bla bla bra內衣騷，場面幕幕火辣，吸引近百名宅男捧場！新八模先由商場一樓行落大堂，沿途被宅男喪影，Chrissie則以粉紅色bra壓軸出場，雖然她「錫身」穿上短褲，但強勁事業線仍力壓一眾師妹！

否認接觸富豪

近日狂谷寫真集的Chrissie，被傳獲內地富豪睇中買起新書的內地版權，並花逾百萬為她作海陸空宣傳，Chrissie聞言說：「佢幾時出現？咁幾好喎，如果係真我唔介意，（如果富豪話要包你？）唔會，講咗咁耐都冇出現過，（追你接唔接受？）冇諗過，（向男友派定心丸？）我唔會變。」對男友從一而終，Chrissie賣口乖表示會買內褲給男友，問男友喜歡她穿甚麼內衣，她說：「佢咩都鍾意。（唔着最鍾意？）吓，我唔知呀，點可以唔着呢！我覺得bra係女仔貼身衣物，我自己鍾意喱士，（色誘男友？）呢啲唔好講啦，（男友陪買bra？）未試過，佢唔係好熟悉。自己喺第二度見到得意貼身用品會送畀佢。」現場見Chrissie心口紅卜卜，問她是否敏感？她說：「成日都敏感，（太操勞？）可能因為夏天，做得運動多，做gym咋！」

新八模在商場一樓向人群揮手後，徐徐步行到大堂上演內衣騷。	周秀娜率新八模玩轉商場，當眾上演內衣騷。	拿着球拍的Suki，一身sporty味道。
Vibeke小小一個動作即可愛滿分！	Hidy嘟起小嘴拿足球當道具，盡展活潑可愛一面。	新八模穿上透視內衣跳舞，辣在場宅男。

今年望可買樓

Chrissie又表示今次行騷酬勞十分滿意，問她穿短褲是否嫌酬勞少？她說：「其實係跟番個客要求，本身我都着咗喺入面，不過大家睇唔到啫！」提到她成為世界盃出騷王，她說：「好開心，但個數就多謝大家抬舉喇！（賺咗幾位數？）非常滿意，夠畀首期囉！（買貝沙灣？）咁誇張！希望今年可以達成買樓願望啦！（有傳明年嫁人？）咁快？佢未向我求婚喎，嫁唔出，我雖然都憧憬結婚，但暫時未。」

文：專案組　攝：李廣成