Mango啤啤夫借酒消愁

喺娛樂圈浮沉多年嘅Mango，自從舊年畀人影到同郭富城遊車河後，即刻反彈，工作接踵而來，仲同「城嫂」熊黛林拗手瓜。事後城城即刻出嚟公開澄清，實行同Mango劃清界線。後來Mango轉移陣地，轉界內地當紅小生黃曉明，可惜最後都係徒勞無功。

轉場再玩

隨住緋聞丟淡，Mango嘅人氣下跌。早前八太就喺中環蘭桂坊見到化行妝嘅Mango，玩到凌晨差唔多三點先捨得走。見佢飲到行條直線都行唔到，側晒身咁要向女友人借力。見佢着住對高踭鞋行到扁晒嘴，露出痛楚表情，真係驚佢跌親架，好彩女友人全程翹實Mango，萬一仆親就醜死人！

正當八太以為飲到「啤啤夫」嘅Mango會搭車返歸之際，無喇喇又畀佢哋撞見兩個朋友。原本目光呆滯嘅Mango當堂唔捨得走，同朋友傾咗幾句之後，佢就跟住兩個朋友行樓梯轉場去咗Dragon i繼續狂歡。

其實佢都醉成咁，返屋企瞓覺好過啦！唔通佢想借酒消愁？

Mango行到扁晒嘴，露出痛楚表情。	Mango過馬路嗰陣不停講嘢。	Mango行樓梯轉場去另一夜店再狂歡。