港男叉腰托下巴報到

「香港先生」將於八月廿一日舉行，十位參賽者昨日首次返電視城集合，今年肌肉型男少之又少，當中有熟口熟面的○五年「亞洲先生」亞軍翟威廉及之前被刊登了Facebook內肌肉照的Angus，更有叉腰擺甫士的俏男子。

Angus早前在Facebook內的肌肉照被刊登，問他有否被無綫下令剷走，他笑而不答；廿五歲的翟威廉笑時似足「三哥」苗僑偉，不過有幕前經驗的他擺出雙手叉腰甫士，現場記者唔收貨再叫他擺多個型甫士，他怕醜求饒說：「唔好玩我啦！」

「露點柴九」嘉裕	「木面怕醜仔」Argus	來自溫哥華的Michael行路「印印」吓，說話時更歪嘴。
來自馬來西亞的李言功用電眼發功冧女記者。	Nick擺出托下巴甫士，十分嬌俏。	翟威廉的笑容似足「三哥」。
苗僑偉

乜都話唔知

每年都有騎呢參賽者，身形瘦削的Nick居然擺出托下巴嬌俏甫士；十八歲怕醜仔Argus則非常驚青，不時眨眼；來自溫哥華的廿歲Michael行路十足Hip Hop友，說話時又歪嘴，問他是否專登由外國返來參選，他居然謂：「唔知呀！」至於來自馬來西亞、操國語的李言功擺出似樣姿勢，不過影相時卻拋媚眼電女記者。

無綫高層何麗全表示參賽者年齡最年輕十八歲、最年長為卅五歲，當中包括健身教練、學生及表演者，有些更懂詠春功夫，眾人於本月十六日與港姐到韶關拍攝外景。

製作費加碼

對於不少港姐、港男相片流出，無綫高層何麗全表示：「我哋好嚴格，去聚會時都會收起佢哋嘅電話，相機都唔畀帶。」至於決賽當晚的泳裝3D立體技術，他表示除商場外，亦租用了一間3D戲院，招待三百名觀眾入場欣賞，製作費亦比往年多出百分之三十。

此外，身為Angus的好友袁偉豪表示對方都有打電話給他，袁偉豪謂：「佢暫時都好輕鬆，（有冇叫佢剷走Facebook啲相？）啲相冇乜問題，都係以前模特兒面試嘅相，至於男女合照都好正常啫。」

文：影視組