王祖藍從一而宗放笑彈

由低做起的祖藍扮嘢扮出位殺出新血路，在節目《荃加福祿壽》中創造話題角色HandleBaby，其金句「我接受唔到囉！」更成為不少都市人的口頭禪。人氣加才華令祖藍「升呢」踩入伊館開騷，舉行一連兩場《咪咁扮嘢王祖藍演嘢會》，努力得到回報的同時，愛情亦有着落。

成名着數多

到底知名度為祖藍帶來怎麼好處？他說：「有着數o架！試過買一杯雪糕，佢話唔使錢，早知話要四杯啦！又可能飲茶唔使排隊，不過排隊都有排隊好，可以同街坊傾吓偈，感受吓生活，當中都有好多創作元素。」凡事有利有弊，知名度直接影響祖藍私生活，除最疼愛的「餅印」妹妹被揭真面目，沐浴於愛河的祖藍，更要費盡周章保護情苗。他說：「喺感情方面有啲麻煩，想等穩定啲先真正公開。同埋忙囉，休息時候好少，真係有壓力o架！最怕係體力應付唔到，但係開心嘅，心理素質亦好好，信仰畀我好大支持，好似之前布道會，一路做其實一路叉緊電o架！」

工作接踵而來，祖藍透露女友從未因兩人聚少離多而「詐型」，反而處處給予他最大支持與關懷。他說：「其實我知佢都擔心我體能應付唔到，佢真係好支持我，大家信念一樣，信仰比愛情大。（有冇煲湯你飲？）都見唔到，煲咗都飲唔到啦！」兩人相處只能靠電話傳情、朋友傳話，但憑着一份默契，對祖藍來說已很快樂。他說：「拍拖都係想有嗰吓潤一潤、冧一冧，好滿足喇！唔係成日見面，惟有利用公司資源氹佢。好似出活動唱情歌，會同佢講係送畀佢，做戲又會叫佢留意情節，好多嘢都係心照，因為我哋有好好嘅朋友基礎，即使好耐唔見亦有心貼心嘅感覺。」

冇後悔拍拖

已拍拖一年，未能抽空為女友製造驚喜看來不重要，皆因祖藍已贈女友最大的定心丸，堅定視對方為結婚對象。問到會否在演嘢會表演時乘機求婚？他說：「仍有困難要排解，等事業有成先，調節家庭同工作。其實我嘅工作性質都有帶畀佢壓力，但我哋了解清楚呢啲問題先開始拍拖，冇後悔！」

祖藍預告在演嘢會將才藝大匯集，因性質不同，未怕與林海峰及黃子華的棟篤笑作比較。他稱：「橋已經諗咗，但其實每日都有更新，希望觀眾睇到我嗰團火，亦令佢哋有共鳴同感動。」祖藍更揚言要大破信仰沉悶框框：「信仰唔係等於傳統，如果唔係就冇MC Jin啦！要畀人知道基督教可以充滿活力，分享我哋嘅喜樂，係神畀我力量，如果唔係一定捱唔到今日，又唔係為錢。」祖藍更言要「大玩基督教」，以潮流說非一般的道：「有好多人唔係憎基督教，係憎基督徒，怕煩、怕返教會。（扮嘢同信仰有牴觸？）有底線嘅，好多嘢都需要改革，神唔係要我哋行為上去表現，係內心，我心係冇變！」他又言要從扮嘢中帶出訊息：「其實香港人有時都好扮嘢，今次唔係扮明星，係圍繞大家周圍嘅事，又會分析點解啲人咁鍾意睇男人扮女人。」

食薯條減壓

面對壓力，不少都市人會選擇「扯煙」、「隊啤」減壓，祖藍則認為：「食薯條同飲可樂囉，好滿足o架！雖然聲仲係沙，咪買一包薯條同大家分囉，過咗個癮就算，可樂都係飲一杯咋！」這算是「知名度」的代價吧！

文：音樂組

攝：黎志輝