(12)湯寶珍拒愛 富家子威脅爆料

《2010香港小姐競選》十五位候選港姐昨日先後到航空公司及化妝品公司出席活動，是非多多的新一屆港姐，繼「密實湯唯」(10)李文煊被指是內定冠軍；(4)文凱玲、(6)林碧珍、(10)馬鈞怡攬仔照曝光後，早前印度外景疑「裝假狗」傳遭同組佳麗杯葛的湯寶珍又惹是非。

討論區上有化名「rubyring125」自稱是湯寶珍已絕交的舊友，爆料狂插她為人貪小便宜、鍾意黐有錢同學、又當追求者是提款機及指湯寶珍是同性戀者。

無意報警

湯寶珍昨日有備而來回應事件，聲稱之所以惹是非，是有富家子追求不遂向她報復，她說：「我知道爆料係邊個，其實佢唔係女仔，係一個有錢嘅男仔嚟，因為佢追唔到我，要脅我唔接受佢追求，就會向傳媒爆料，佢其實由印度拍外景已經不斷詆毀我，參選期間都有打電話嚟。」不過當問到湯寶珍為何不報警求助，她則說：「我唔識呀，都想佢有錦繡前程，唔想佢後悔莫及。」

湯寶珍又指與該富家子是透過友人生日會認識，相識了兩三年，後來才察覺對方有意追求，她已拒絕。問到湯寶珍何故拒愛？她說：「佢大學畢業之後都冇做嘢，我鍾意啲靠自己努力、對社會有貢獻嘅男仔。」

彭慧中面對美食，也拋下顧忌盡情吃喝。

湯寶珍自顧玩手機，似沒將是非放在心上。

無綫支援

對於爆料者指湯寶珍貪小便宜及同性戀，她則說：「可能佢追唔到我咪話我鍾意女仔囉。我從來都冇收過佢嘅名貴禮物，如果我貪錢都已經接受咗佢追求啦。」

無綫外事部副總監曾醒明就湯寶珍遭到威脅一事，坦言並不知情，但公司亦表關注，無綫會直接與湯寶珍單獨見面，了解事件嚴重性。問到是否要佳麗主動投案，無綫才會幫助解決問題？曾醒明說：「都要尊重佳麗個人私隱，好難叫佢哋自己講晒啲嘢出嚟先，有啲又未必肯講，但如果有佳麗需要，無綫可給予專業意見及分享嘅。」

此外，一眾港姐完成活動後，返將軍澳電視城，她們在排舞前先到餐廳醫肚，湯寶珍表面上得一眾港姐力撐，但食飯時卻是「獨孤精」一名，不時用電話傳短訊給朋友，自得其樂。雖然不少佳麗為喼弗而忍口，但(8)彭慧中卻開懷大吃。

採訪：影視組