祖藍電車咀女令人羨慕

阿澤、祖藍合作拍戲，齋睇配搭已有一定吸引力，兩人亦因為被對方「深深吸引」而接拍了新戲《人間喜劇》，戲中阿澤飾演內地殺手，愛為角色加料的他，將這個有殺氣的角色添上惹笑鄉音，搞笑效果活現。問阿澤何解有這個構思？他笑言：「大家唔覺得尖沙咀、銅鑼灣都畀內地殺手攻陷咗？只不過佢哋落嚟血拼（買嘢），但佢哋充滿住殺意，尤其是江門嚟嗰班，我就係飾演江門殺手，哈哈！」

向內地客偷師

問阿澤有冇見過一些令他難忘的遊客「血拼」？阿澤即帶鄉音地表示：「喎（我）曾經去過一間好速（出）名賣格仔嘅英國傳統名店，有個內地遊客話攞個袋嚟畀喎（我）睇，點解呢個袋冇格仔，咁我典（點）用，你哋唔可以唔出冇格仔o架喎，你哋一定要出有格仔，呢件褸就有格仔，個sales就話咁咪啱你囉，但個內地遊客話啲格仔喺裏面，咁唔得o架，有冇啲格仔喺歪（外）面？呢件事好難忘，亦令我演內地殺手時，多咗好多創作靈梘（感），所以好多謝嗰位遊客。」

阿澤如此花心思在角色上，問祖藍有沒有使出甚麼絕技抗衡？他卻是無招勝有招：「好耐冇見過自己做番男人，仲要係做番自己，演一個冇拖拍嘅寂寞編劇，當咗女主角係女朋友，有一場電車戲，可以話係香港一日咀，由西營盤咀到北角，又由北角咀到去西營盤，呢種另類電車男，我諗好多男人都想做，（咀咗幾耐？）總之就好多take，單單角度都有五、六個。」

祖藍在《人間喜劇》中，最開心是做回自己。

祖藍（左）與阿澤是搞笑高手。

兩人惺惺相惜

阿澤由茄哩啡捱起，祖藍則是學院派，畢業於演藝學院，但兩人合作，一點摩擦都冇，祖藍欣賞阿澤的街頭智慧，阿澤則看到祖藍愛觀察、揣摩演戲技巧，河水不犯井水，阿澤笑言：「同一類人先易有衝突，你睇黃秋生同吳鎮宇就知啦，我同祖藍係一對可以長期合作嘅影友。」

文：影視組

攝影：司徒國榮

場地：cafe 21