黎明幾醜都制 子丹傻佬一條
曾與黎明、甄子丹、梁朝偉等大卡士合作過的資深導演及編劇莊文強（Felix），對這班巨星有一套獨特的看法，子丹是「傻佬」而不是「寸」、黎明為突破自己幾醜都冇所謂、梁朝偉當紅是因知道安全線在哪裏……
莊文強畢業於香港浸會大學傳理系，曾撰寫過不少好劇本，成名作是與麥兆輝導演合編的《無間道》三部曲，05年首次執導《情義我心知》，合作過的影壇紅人分別有黎明、古天樂、梁朝偉及甄子丹等。雖然以上一眾演員，予人感覺都是愛美之人，但Felix卻笑指是天大誤會，尤其黎明在Felix心中更是「幾醜都冇所謂」：「好似《情義兩心知》搞到咁佢都肯制，其實原本個造型冇咁衰，係佢自己要去到好盡咋！」
偉仔死守底線
Felix指黎明的致命傷亦正是去得太盡：「佢成日好搏命想突破自己，變咗會過火，好似梁朝偉咁，佢知道安全線同自己值錢嘅嘢喺邊，佢就打死都唔會過嗰條線，但黎明就唔同，佢成日喺條線上面度嚟度去，變咗好易過界。」Felix更以獨特理論解說黎明被喻為「九唔搭八」的爛gag：「只不過因為好多時佢都用普通話思考啫，如果佢喺內地做訪問，就唔會有爛gag出現。」
除了黎明，「宇宙最強」甄子丹亦是Felix接觸得頗多的影壇巨星，對於子丹，Felix的評語竟是「一條傻佬」：「佢好搞笑，份人又簡單，最緊要拍完戲有得返屋企！（啲人話佢寸？）我覺得佢措辭好啲就會少啲誤會。」
子丹快鏡耍拳
Felix更自爆曾近距離感受子丹的真功夫，令他嘖嘖稱奇：「佢試過喺我面前，從我嘅頭部位置耍拳耍到落腳，佢每個動作都好快、好到位！唔信你哋睇番《錦衣衛》，佢同吳尊對打嗰啲戲，我睇落去以為子丹校咗快鏡添。」
Felix更指出子丹除動作流暢，更有極強的記憶力及高度的集中力：「有時一場戲要記廿幾招，子丹睇完一次後，可以一招不漏咁耍番出嚟，而且仲要記得點樣配合番個鏡頭同走位！」
文：影視組 攝：沈健程